Kamran Əliyev: "Bütün növ nəqliyyat vasitələrinin sürücüləri təhlükəsizlik kəmərindən istifadə etməlidir"
Avtobuslarda hər gün yüzlərlə sərnişin daşınır. Avtobus sürücüləri öz həyatına biganə yanaşdıqları kimi, sərnişinlərin də həyatına eyni gözlə baxır.
İstənilən növ minik vasitəsini idarə edənlər mütləq təhlükəsizlik kəməri taxmalıdır, bu bir qaydadır, istər minik vasitəsi olsun, istər yük maşını və ya sərnişin avtobusu. Ancaq sərnişin avtobuslarının sürücüləri bu qaydaya əməl etmir. Onlar təhlükəsizlik kəmərini taxmadan adıçəkilən nəqliyyat vasitələrini idarə edir.
Respublika Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi Kamran Əliyev "Bakı-Xəbər"ə açıqamasında qeyd etdi ki, bütün növ nəqliyyat vasitələrinin sürücüləri təhlükəsizlik kəmərindən istifadə etməlidir: "Sürücü təhlükəsizlik kəmərini istifadə etməsə, o halda inzibati qaydada məsuliyyətə cəlb olunacaq. İnzibati Xətalar Məcəlləsinin tələbinə əsasən, təhlükəsizlik kəmərindən istifadə etməyən sürücü 40 manat məbləğində cərimə olunur".
Nəqliyyat sahəsi üzrə ekspert Ərşad Hüseynov "Bakı-Xəbər"ə açıqlamasında qeyd etdi ki, istehsal olunan bütün avtobuslarda təhlükəsizlik kəməri var: "Şəhərlərarası avtobuslar və şəhəriçi marşrutlarda da təhlükəsizlik kəməri var. Mən sizə deyim ki, şəhərlərarası hərəkət edən avtobuslarda tək sürücülər üçün deyil, eyni zamanda, sərnişinlər üçün də təhlükəsizlik kəməri var. Şəhərdaxili avtobuslarda sərnişinlər üçün təhlükəsizlik kəməri yoxdur. Bəllidir ki, şəhərdaxili maşrutlarda sərnişinlər ayaqüstü də daşınır".
Həmsöhbətimizin sözlərinə görə, təhlükəsizlik kəməri sürücünün həyatını qoruyur: "Ekstremal hadisə baş verərsə, sərnişinlərdən fərqli olaraq sürücü avtomobilin düzgün idarə olunmasına görə məsuliyyət daşıyır".
Ə.Hüseynov qeyd etdi ki, sürücü təhlükəsizlik kəmərindən istifadə etməzsə, 40 manat məbləğində cərimələnməlidir: "Cərimə bütün nəqliyyat vasitələrində təhlükəsizlik kəmərindən istifadə etməyənlərə qarşı tətbiq olunur".
Günel CƏLİLOVA
