İlqar Orucov: "Bölgələrdən oxumağa gələn tələbələrin yaşayışının təmin olunması üçün kreditin verilməsi təqdirəlayiqdir"
Azərbaycanda "Maarifçi" Tələbə Kredit Fondu tərəfindən təhsilhaqqı kreditlərindən əlavə, tələbələrə yataqxana haqqı, tədris materialları, elmi-tədqiqatlar və araşdırma və s. kimi ehtiyac və təyinata görə də kreditlərin təqdim olunması planlaşdırılır. Bu barədə "Maarifçi" Tələbə Kredit Fondunun yaydığı məlumatda qeyd olunur. Bildirilir ki, bu kreditlərin şərtləri hələlik məlum deyil.
Hazırda təhsil kreditləri ödənişli əsaslarla təhsil alan tələbələrə təhsilhaqqı üzrə borclarının ödənilməsi üçün verilir. "Maarifçi" Tələbə Kredit Fondunun yeni fəaliyyətə başladığını nəzərə alaraq, 2016-cı il ərzində yalnız bakalavr pilləsində təhsil alan tələbələrə təhsilhaqqı kreditləri təqdim olunacaq. Növbəti illərdə bu kreditlər digər təhsil pillələri üzrə təhsil alan tələbələrə də şamil oluna bilər. Eyni zamanda, növbəti illərdə digər kredit növləri üzrə də fəaliyyətə start veriləcək.
Qeyd edək ki, tələbələrə kreditlər standart paket olaraq 8 %-lə, güzəştli paket olaraq isə 6%-lə təklif olunur. Güzəştli paket üçün kreditin qaytarılma müddəti 120 ay, standart paket üçün 60 aydır. Fond tələbədən təhsil müddəti və güzəşt müddəti ərzində faiz borcunun ödənilməsini tələb etməyəcək. Bu müddət ərzində yığılan faiz borcu əsas məbləğə əlavə olunacaq. Tələbələr kreditləri təhsilini başa vurduqdan, işlə təmin olunduqdan sonra ödəməyə başlayacaq.
Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov "Bakı-Xəbər"ə açıqlamasında qeyd etdi ki, tələbələrə təhsil kreditinin verilməsi yalnız ali təhsil alanların xeyrinə olacaq: "Amma gələcəkdə bu kreditlərin necə qaytarılacağı sual doğurur. Bütün hallarda, gənclərin təhsilli olması üçün onlara tələbə kreditinin verilməsi vacibdir".
Həmsöhbətimiz bildirdi ki, tələbə krediti yalnız dövlət ali təhsil müəssisələri üçün nəzərdə tutulub.
İ.Orucov tələbə yataqxanaları ilə bağlı ciddi problem olduğunu dilə gətirdi: "Əksər universitetlərin yataqxanası yoxdur. Yalnız özəl ali məktəblərin bəzisinin tələbə yataqxanası var. Bölgələrdən gələn tələbələr yaşayış sahəsində ciddi problemlərlə üzləşir. Elə gənclər var ki, onlar ali təhsil almaq istəyir. Amma Bakıda yaşayış yerləri yoxdur. Bölgələrdən oxumağa gələn tələbələr üçün yaşayış kreditinin verilməsi də təqdirəlayiqdir".
Müsahibimiz hesab edir ki, "Maarifçi" Tələbə Kredit Fondunun keçirdiyi bu aksiya sosial xarakterlidir.
Günel CƏLİLOVA
