Seyid Camal Əzimbəyli: "Mən bu çağırışı alqışlayıram"
Xəbər verildiyi kimi, Qafqaz Müsəlmanları İdarəsi Aşura günü ilə əlaqdar fətva verib. Fətvada deyilir ki, ölkəmizdə İmam Hüseyn (ə) əzadarlığı, Peyğəmbər nəvəsinin iman, mənəviyyatın saflığı uğrunda mübarizəsinin yad edilməsi bədbinlik əhval-ruhiyyəsinin təlqini deyil, Vətən və iman sevgisinin təcəssümü, işğal olunmuş Qarabağ torpaqlarının azad edilməsi uğrunda mübarizədə fədakarlıq və dəyanət örnəyi olmalıdır: "Məhərrəm ayının 10-u - Aşura günü 2016-cı il oktyabr ayının 12-nə təsadüf edir. Bu münasibətlə bütün dindarlara dərin hüznlə başsağlığı verir, Allah-Təaladan səbr, məğfirət diləyir və İmam Hüseyn (ə) əzadarlığının İmamın (ə) şəninə layiq şəkildə keçirilməsini tövsiyə edirik".
Qazılar Şurası xatırladıb ki, mövcud qanunvericiliyə əsasən, Aşura mərasimləri məscidlərdə, ibadət ocaqlarında və onlara aid ərazilərdə ictimai asayiş qaydalarına riayət olunmaqla keçirilməlidir: "Qurşağadək soyunub zəncir, sinə vuraraq bədənə xəsarət yetirməklə qan çıxarmaq müqəddəs şəriətimizə uyğun deyil və ictimai qınağa səbəb olur. Əzadarlar özlərinə və digərlərinə xəsarət yetirməməli, başqalarını da belə hərəkətlərə təhrik etməməlidir. Son illər təziyə günlərində Qafqaz Müsəlmanları İdarəsinin təşəbbüsü ilə gerçəkləşən və xalqımız tərəfindən təqdir edilən tibbi ehtiyaclar üçün Kərbəla şəhidlərinin və Vətən uğrunda şəhid olmuş həmvətənlərimizin xatirəsinə qan verilməsi aksiyalarının təşkili ən münasib əzadarlıq nümunəsidir. Buna görə də bu, həyat verən savab əməl - örnək aksiya din xadimləri tərəfindən təbliğ edilməlidir".
Onu da qeyd edək ki, QMİ-nin məlum fətvası və bununla bağlı çağırışı ictimaiyyətdə rəğbətlə qarşılanır. Əksər insanlar hesab edir ki, zəncir vurub qan çıxarmaqdansa, qan verilməsi daha məqsədəuyğundur.
Məsələyə münasibət bildirən şərqşünas Seyid Camal Əzimbəyli bunu dəstəklədiyini vurğuladı: "QMİ və Dini Qurumlarla İş üzrə Dövlət Komitəsi birgə bu məsələ ilə bağlı ciddi maarifləndirmə işi aparır. Qazılar Şurası tərəfindən verilən fətva hər bir kəs tərəfindən təqdir olunduğu kimi, mən də bunu dəstəkləyirəm. O cümlədən, Qarabağ Seyid Ocaqları tərəfindən birmənalı olaraq nəinki təqdir olunur, hətta bunun təbliğatı aparılır. Hətta müəllifi olduğum verilişdə də bunu xüsusi olaraq qeyd etdim. O baxımdan düşünürəm ki, Allahına, dininə, dövlətinə, Əhli-beytinə bağlı olan hər bir kəs bu fətvanı yerinə yetirməyə mənən borcludur. Ona görə borcludur ki, biz İmam Hüseyni (ə) öz əməllərimizlə, sevgimizlə yad etməliyik, Allahın bizə əmanət etdiyi bədənimizə və ruhumuza zülm etməklə deyil. Zəncir vurub qan çıxarmaq ən böyük günahlardan biridir. Ona görə də mən bu çağırışı alqışlayıram. Düşünürəm ki, İmam Hüseyn (ə) əzadarlığında iştirak edən hər bir şəxs bu qaydalara riayət etməyə borcludur. Çünki İmam Hüseynin (ə) buna ehtiyacı yoxdur ki, kimlərsə başını yarsın, canına qəsd etsin. Əksinə, bu, İmam Hüseynin (ə) ruhuna, onun pak davasına qarşı sayğısızlıqdır. Bu günlərdə biz birmənalı olaraq Qarabağ şəhidlərini yad etməliyik, vətənimizin, dövlətimizin varlığı üçün dua etməliyik". Vidadi ORDAHALLI
