Eyyub Hüseynov: "Süni uşaq qidalarından çox istifadə olunduqda körpələrdə vitamin çatışmazlığı yaranır"
Məlumdur ki, hazırda bir çox analar körpə uşaqları süni qidalarla böyüdür. Bunu bəziləri məcburiyyətdən, bəziləri isə sırf özlərini düşünərək edir.
Ana südünün faydalı olması haqqında dəfələrlə bildirilib. Süni uşaq qidalarının tərkibi barədə də oxucularımıza məlumat vermişik. Bu günlərdə Səhiyyə Nazirliyi Elmi-Tədqiqat Pediatriya İnstitutunun direktoru, baş pediatr Nəsib Quliyev körpələrin süni qida məhsulları ilə qidalanmasına münasibət bildirərkən deyib ki, hazırda süni qida şirkətləri məhsullarını satmaq üçün bütün üsullardan istifadə edir. N.Quliyevin sözlərinə görə, alimlər uşaqlara bu qidaları verib və ilginc nəticələr əldə edib: "Ana südünün əvəzləyicisinin yaradılması ideyası məhz tibb işçilərindən gəlib. Təbii ki, canlı orqanizmdə yaranan bir şeyi canlıdan başqa heç kim yarada bilməz. Ana südünün əmələ gəlməsi üçün bir neçə mərhələ lazımdır, bunun üçün isə canlı orqanizm olmalıdır. Ancaq ana südünün əvəzləyicisinin yaradılması çox normal fikirdir. Çünki bəzi hallarda anaların körpələrini öz südü ilə qidalandırmasında maneələr yaranır. Təəssüf ki, zaman-zaman bu ideyalar istehsalçılar tərəfindən oğurlandı və ana südünün əvəzləyicisi kimi təqdim edilən süni qidaların sayı çoxaldı. Ana südünün əvəzediciləri olan süni qida məhsullarının qarşısını hazırda tibb işçiləri də ala bilmir. Hazırda süni qida şirkətləri məhsullarını satmaq üçün bütün üsullardan istifadə edir. Həmin şirkətlərin əməkdaşları qapı-qapı gəzir, hətta məhsulları hədiyyə kimi verirlər. Biz isə belə mənəviyyatsız işin qurbanına çevrilirik. Təəssüf ki, bunu edən də ata və anadır. Körpələrin həyatını 5-10 manata satmaq olmaz. Səhiyyə Nazirliyi belə hallara qarşı çox ciddi mübarizə aparır".
Pediatr Vaqif Qarayev bizimlə söhbətində bildirdi ki, ana südü olan yerdə süni uşaq qidalarından istifadə etmək düzgün deyil: "Nəsib müəllimin narahatlığı başadüşüləndir. Amma bu o demək deyil ki, ananın südü olmayanda uşaq ac qalmalıdır. Süni qidalar uşaqların sağlamlığına, fiziki və əqli inkişafına ana südü qədər təsir göstərməsə də, ana südü olmayanda bu qidalardan istifadə etmək lazımdır. Düzdür, ananın südü ola-ola, süni qida təklif edən həkimlərimiz var. Bu isə artıq mənəvi cinayətdir. Xüsusən də doğum evlərində südü olan analara belə süni qidalar məsləhət görürlər. Buna səbəb də həkimlərlə firmaların anlaşmasıdır. Bunu bütün ölkə bilir, gizlətməyin heç bir mənası yoxdur. Amma xoşbəxtlikdən bu tendensiya sistem şəklini almayıb. Gözüaçıq analarımız var ki, haqlı olaraq həkim məsləhətinə qulaq asmır. Axı ana südü ola-ola körpəni niyə süni qarışıqlarla qidalandırmalıdır ki?! Elə analar da var ki, özləri körpələrini qidalandırmaqdan imtina edir. Belə halda isə ananın daşıdığı məsuliyyət həkiminkindən qat-qat üstündür".
Azad İstehlakçılar Birliyinin (AİB) rəhbəri Eyyub Hüseynov bildirdi ki, süni uşaq qidalarından çox istifadə olunduqda körpələrdə vitamin çatışmazlığı yaranır. Onun sözlərinə görə, Azərbaycanda uşaq qidalarının satışında və təbliğatında qanun pozuntularına yol verilir: "Uşaq qidaları məhsullarının distribütorları pediatrlarla heç bir stimullaşdırıcı görüş və tədbirlər keçirməməlidir. Onların pediatrlarla əlaqələri məhdudlaşdırılmalıdır. Azərbaycanda isə əksinədir. Bu distribütorlar həkimlərlə sıx iş birliyi qurub. Bizdə hətta rəsmi məlumatlar da var ki, belə şirkətlər pediatrları stimullaşdırmaq üçün onları müxtəlif xarici ölkələrdə keçirilən tədbirlərə də göndərir. Ümumiyyətlə, doğum evlərində və uşaq xəstəxanalarında uşaq qidaları ilə bağlı heç bir təbliğat vasitələrindən istifadə edilməməlidir. Çünki tədqiqatlar göstərir ki, süni uşaq qidalarından xəbər tutan analar tənbəlləşir və onlardan istifadəyə meyl edir. Hətta bu zaman ananın südü çəkilir".
E.Hüseynovun sözlərinə görə, uşaq qidalarının tərkibi çox mürəkkəb olduğundan, onların yoxlanması da çətindir.
Günel CƏLİLOVA
