Fatimə Hacıbəyli: "Məktəblərdə narkomaniya əleyhinə tədbirlərin keçirilməsi şagirdlərin gələcək həyatına daha sağlam yanaşmasına səbəb olacaq"
Bu gün bəşəriyyəti düşündürən, rahatsız edən ən ağrılı problemlərdən biri və ən başlıcası, cəmiyyətin ciddi bəlasına, millətin gələcəyi üçün təhlükə mənbəyinə çevrilən narkomaniyadır.
Əlbəttə, başqa dövlətlərlə müqayisədə respublikamızda narkomaniya o qədər də dəhşətli şəkil almayıb. Ancaq yaddan çıxarmaq olmaz ki, narkomanlıq yoluxucu xəstəlikdir. HİV virusuna, QİÇS-ə aparan bir yol kimi, gizli şəkildə sürətlə yayılmaq xüsusiyyətlərinə malikdir. Yeniyetmə və gənclərin narkomaniyaya qurşanması onların təhsildən yayınmasına, ictimai həyatdan uzaqlaşmasına, cinayətlərə meyl etməsinə, ən əsası da sağlamlığının zərbə altında qalmasına səbəb olur.
Bəzən həyətdə, küçədə, məktəbdə, işdə hətta bir narkomanın
olması ətrafdakılara fəlakətli təsir göstərir. Çox vaxt narkotik qəbul etmək təklifi alan gəncin bu addımı atması narkotik vasitələrin təhlükəliliyi haqqında informasiyaya malik olmaması, onun tərəfindən bu qorxunc bəlanın dərk edilməməsi və zərərlərinin lazımi dərəcədə qiymətləndirilməməsi şəraitində baş verir və beləliklə, narkotikə ömürlük asılılıq yaranır.
Orta məktəblərin narkomaniyaya qarşı apardığı təbliğat
çox güclü vasitədir. Məktəblərdə narkomaniya, narkobiznes və ona qarşı mübarizə mövzusunda tədbirlər keçirilir. Mütəmadi olaraq paytaxt məktəblərində narkomaniyanın zərərləri barəsində maarifləndirmə işi aparılır.
Xətai rayonundakı orta məktəblərdə narkomaniya və erkən nikahlar mövzusunda silsilə tədbirlər keçirilir. Xətai Rayon Polis İdarəsi adıçəkilən rayonun tədris müəssisələrində mütəmadi olaraq bu kimi tədbirləri təşkil edir. Belə tədbirlərin keçirilməsi müsbət haldır. Şagirdlər narkotiklərin hansı fəsadlara səbəb olacağından hələ məktəb yaşlarından xəbərdar olur.
Bu günlərdə Xətai Rayon Polis İdarəsinin təşkilatçılığı ilə, rayonun növbə ilə müxtəlif məktəblərində olmaqla, bu dəfə 265 nömrəli məktəbdə müvafiq tədbir keçirilib. Tədbir idarənin məsul əməkdaşları, müəllim heyəti, valideynlər, şagirdlər və aidiyyəti qurumların nümayəndələrinin iştirakı ilə baş tutub.
Məktəblərdə narkomaniya əleyhinə keçirilən tədbirlər hansı effekti verə bilər? Mövzu ilə bağlı ekspertlərə müraciət etdik. Təhsil eksperti Əjdər Ağayev "Bakı-Xəbər"ə açıqlamasında qeyd etdi ki, məktəblərdə narkomaniya əleyhinə keçirilən tədbirlərdə əsas yük məlumatın üzərinə düşür: "Uşaqlara narkomaniyanın ziyanlı olmasını elə şəkildə başa salmaq lazımdır ki, onlar bunun gələcəkdə nələrə səbəb olacağını bilsin. Bu gün əksər ailələr uşaqlarına narkomaniyanın fəsadları haqqında məlumat vermir. Təbii ki, o ailələrin uşaqları gələcəkdə bilmədən narkomaniyanın qurbanına çevrilir. Bu cür tədbirlər respublikanın bütün məktəblərində keçirilməlidir. Heç olmasa rüb ərzində bir dəfə keçirilməsi vacibdir".
"Vəfa" Sosial İctimai Birliyinin rəhbəri Fatimə Hacıbəyli qəzetimizə açıqlamasında bildirdi ki, müasir dünyanın ən böyük bəlası narkomaniyadır: "Təəssüf ki, bu bəlanın qurbanı elə məktəblilər olur. Onlar narkotikin nə olduğunu bilmədən buna aludə olur. Gələcəkdə tək özlərinin deyil, ailə üzvlərinin də həyatını məhv edirlər. Bu səbəbdən də düşünürəm ki, məktəblərdə narkomaniya əleyhinə silsilə tədbirlərin keçirilməsi məqsədəuyğundur. Həmin tədbirlərdə şagirdlərə narkotikdən insanların necə əziyyət çəkdiyi video şəklində nümayiş olunmalıdır. Belə tədbirlərdə valideynlərin iştirakı təqdirəlayiqdir. Danılmaz faktdır ki, bəzi ailələr övladlarına narkomaniya, erkən evlilik və digər problemlər haqqında məlumat vermir. Bu cür tədbirlərdə iştirak edən valideynlərin özü bu bəlanın nələrə səbəb olacağını eşidəcək".
Həmsöhbətimizin fikrincə, məktəblərdə narkomaniya əleyhinə tədbirlərin keçirilməsi şagirdlərin gələcək həyatına daha sağlam yanaşmasına səbəb olacaq.
Günel CƏLİLOVA
