Narkomaniya, erkən nikahlar və dini radikalizm mövzusunda növbəti tədbir Xətai Rayon Polis İdarəsinin təşkilatçılığı ilə bu dəfə beynəlxalq müəllimlər günündə yenicə təmirdən çıxmış 265 nömrəli məktəbdə keçirildi.
Tədbiri giriş sözü ilə açan məktəbin direktoru Yeganə Qurbanova şagirdlərə sağlam həyat tərzinin aşılanmasında, onlar arasında zərərli vərdişlərə, xüsusilə narkotikaya meylin qarşısının alınmasında ümumtəhsil məktəblərinin pedaqoji kollektivlərinin, xüsusilə psixoloqların qarşısında mühüm və məsul vəzifələrin durduğunu qeyd etdi.
Bildirildi ki, dünyanı cənginə alan bəlaya və onunla mübarizəyə qarşı ölkəmizdə də uğurlu mübarizə aparılır. Yəni gündən-günə kürəsəlləşən dünyamızda uşaqlara diqqət və qayğının artırılması, valideynlərlə yanaşı, bu gün dövlətin də nəzarətindədir. Məhz buna görə də aidiyyəti qurumların cəmiyyəti narahat edən problemlərə diqqət çəkib həyəcan təbili çalmaları, əlbəttə ki, başadüşüləndir.
Məktəb direktoru Y.Qurbanova Azərbaycan Polisinin gələcəyimizi və gəncliyimizi düşünərək narkomaniya ilə ciddi mübarizəsini çox yüksək qiymətləndirdi. Məhz keçirilən bu tədbirin də onların təşkilatçılığı ilə baş tutduğunu deyib qonaqları təqdim etdi. Rayon Polis İdarəsinin rəisi, polis polkovniki Muradəli Babayev şəxsiyyətin inkişaf etdirilməsi üçün zəruri olan keyfiyyətlərin, vərdişlərin formalaşmasında məktəblərin rolunu xüsusi vurğuladı. O qeyd etdi ki, narkomaniya adlı bəladan qurtulmaq, onunla mübarizə aparmaq üçün səylərimizi birləşdirməliyik. Məktəb, valideyn və polis həmrəyliyi övladlarımızı bu bəlanın girdabına düşməkdən qoruyar.
Qeyd olundu ki, ölkə başçısı İlham Əliyevin "Narkotik vasitələrin və narkomanlığın yayılması ilə mübarizə üzrə Dövlət Proqramının (2013-2018-ci illər) təsdiq edilməsi barədə" Sərəncamı bu sahədə daha böyük işlər görülməsi üçün zəmin yaradıb.
İdarə rəisi gənclərin zərərli vərdişlərdən uzaq olmaları üçün cinayətkarlıqla ciddi mübarizə aparan, asayişin keşiyində ayıq-sayıq duran, sabitliyi qoruyan polisin də bu bəla ilə mübarizədə öncüllər sırasında olduğunu, gələcəyimiz olan uşaqları qorumaq naminə bundan sonra da daha ciddi mübarizə aparacaqlarını bildirdi.
Respublika Narkoloji Mərkəzinin şöbə müdiri Afət Məmmədova və QİÇS-lə Mübarizə Mərkəzinin həkimi Səyyarə Nadirova narkotik vasitələrdən asılılığın ağır nəticələri, sağlamlığa vurduğu zərərləri, bu xəstəliyə qarşı görülən profilaktik tədbirlər, yeni müalicə üsulları və ölkədə bu sahədə qəbul olunmuş qanunvericilik barədə geniş məlumat verdi. "Ağ xalatlı xilaskarlar" şagirdləri narkotik vasitələrdən uzaq olmağa, polis və digər aidiyyatı qurumlarla birlikdə aparılan maarifləndirmə işlərində yaxından iştirak etməyə, Azərbaycanın sosial yüksəlişi, parlaq gələcəyi naminə gənc nəslin nümayəndəsi olaraq sağlamlıqlarını qorumağa və pis vərdişlərdən uzaq olmağa çağırdılar.
RPİ-nin Veteranlar Şurasının sədr müavini, Qarabağ qazisi və Çernobıl əlili, təqaüddə olan polis veteranı Adil Osmanov gəncləri vətənpərvərliyə, zərərli vərdişlərə yox deməyə, yaxşı oxumağa səslədi, vətənimizinn inkişafı üçün müasir texnologiyaları öyrənməyin faydasından bəhs etdi.
Yeri gəlmişkən, digər bir maarifləndirmə tədbiri də Azərbaycan Dövlət İqtisad Universitetinin nəzdindəki Maliyyə İqtisad kollecində keçirildi. Tələbələrə narkomaniyanın ölümə aparan ən qısa yol olduğu, erkən nikahların və dini radikalizmin zərəri barədə ətraflı məlumat verildi, onları maraqlandıran suallar cavabsız qalmadı.
Hafiz Təmirov, polis mayoru
