Nadir İsrafilov: "İdman sağlamlıqdır, gələcəyimiz sayılan uşaqların sağlamlığı üçün orta məktəblər idman müəllimi ilə təmin olunmalıdır"
Azərbaycan dövlətinin həyata keçirdiyi mühüm vəzifələrdən biri sağlamlığın möhkəmləndirilməsi və ömrün uzadılmasıdır. Bu vəzifənin həlli əsasən fiziki tərbiyə işinin düzgün qurulmasından, bədən tərbiyəsi və idmanın xalqın gündəlik məişətinə (gigiyena gimnastikası, müalicə gimnastikası, idmanla, ümumi hazırlıqla məşğul olmaq, tibb nəzarətindən və gigiyena amillərindən istifadə etmək) daxil edilməsindən asılıdır. Fiziki tərbiyə orqanizmin forma və funksiyasının inkişafını təmin edir, onun bütün sistemlərini möhkəmləndirir və kamilləşdirir.
Hərtərəfli fiziki tərbiyə sağlamlığın möhkəmlənməsi, əmək qabiliyyətinin artması, ömrün uzadılması üçün təməl rolunu oynayır. Fiziki hərəkətlər orqanizmin möhkəmləndirilməsi və xəstəliklərə qarşı müqavimətin artırılmasında kifayət qədər kömək edir. Bədən tərbiyəsi və idmanla müntəzəm surətdə məşğul olanda sağlamlıq artır və orqanizm möhkəmlənir.
Uşaqlar ilk olaraq orta məktəbdə idmanla məşğul olur. Ancaq bu gün məktəblilər elə də yüksək səviyyədə idmanla məşğul ola bilmir. Bunun səbəblərindən biri də məktəblərdə idman müəlliminin sayının az olmasıdır.
Bakı Şəhəri üzrə Təhsil İdarəsinin müdiri Məhəbbət Vəliyeva Lent.az-a müsahibəsində deyib ki, hazırda Bakı məktəblərində fiziki tərbiyə müəllimi ixtisası üzrə vakant yerlər daha çoxdur. Onun sözlərinə görə, bu, əslində, fiziki tərbiyə müəllimlərinin nəzəri deyil, əsasən praktik biliklərə sahib olması ilə bağlıdır: "Bilirsiniz ki, müəllimlərin işə qəbulu test imtahanları ilə tənzimlənir. Yəni kurikulum proqramının tələblərinə əsasən, fiziki tərbiyə müəllimləri nəzəri biliklərə də malik olmalıdır. Onların da nəzəri biliklərinin aşağı olması nəticəsində daimi işlə təmin oluna bilmirlər. Təhsil Nazirliyi də bunun ciddi problem olduğunu bilir və bununla bağlı nazirliyə müvafiq təkliflərlə müraciət etmişik".
Mövzu ilə bağlı təhsil eksperti Nadir İsrafilova müraciət etdik. O, "Bakı-Xəbər"ə açıqlamasında qeyd etdi ki, bir çox müəllimlər öz ixtisasını dəyişib: "1990-cı illərin əvvəllərində müəllimlərin təkmilləşdirilməsi üçün kurslar açıldı. Həmin kurslara yüzlərlə müəllim cəlb olunaraq ixtisasını dəyişdi. Ən prestijli fənn müəllimi ibtidai sinif müəllimi sayılır. Digər fənn müəllimlərinin bir qismi təkmilləşdirmə kursundan keçərək ibtidai sinif müəllimi oldular. Bunun acı nəticələri ortaya çıxdı və məlum oldu ki, bəzi fənnlərin tədrisi üçün müəllim çatışmır. Bu problem bu gün də yaşanır. Tək idman müəllimi deyil, digər fənn müəllimlərinin də çatışmazlığı yaşanır".
Həmsöhbətimizin sözlərinə görə, müəllimlərin imtahan vasitəsilə işə qəbul olunması onları pedaqogikadan uzaqlaşdırır: "İmtahan yolu ilə pedaqoqların işə qəbul olunması müəllimlik peşəsini hörmətdən salır".
N.İsrafilov onu da əlavə etdi ki, Azərbaycan idman ölkəsinə çevrilir: "Ölkəmizdə idmanın inkişafı və bu sahəyə marağın artırılması ilə bağlı tədbirlər keçirilir. Həmçinin, beynəlxalq idman yarışlarının keçirilməsi bu sahənin vacib olmasından xəbər verir. İdman sağlamlıqdır. Gələcəyimiz sayılan uşaqların sağlamlığı üçün orta məktəblər idman müəllimi ilə təmin olunmalıdır".
Günel CƏLİLOVA
