İsmayıl Əhməd: "Dini mərasimlər yalnız məscidlərdə keçirilməlidir"
Müqəddəs aylardan olan Məhərrəmlik ayı artıq başlayıb. Bu ayda dini xarakterli ayinlər yalnız məscidlərdə keçirilməlidir. Dini ayinlər zamanı evlərdə toplaşmaq, küçələrə çıxmaq qanunvericiliklə yolverilməzdir.
Dini Qurumlarla İş üzrə Dövlət Komitəsinin sədri Mübariz Qurbanlı mətbuat nümayəndələrinə açıqlamasında deyib ki, "Dini etiqad azadlığı haqqında" Qanuna edilən dəyişikliklərlə artıq bu hallara yol verilmir.
M.Qurbanlı əlavə edib ki, bütün dini tədbirlər məscidin içərisində və əhatəsində olmalıdır: "O cümlədən müxtəlif dini atributları da nümayiş etdirmək olmaz. Bu yalnız məscidin daxilində olmalıdır. Əminəm ki, hamı bu qanuna əməl edəcək. Biz bu barədə geniş izahat işi aparmışıq".
M.Qurbanlı qeyd edib ki, məhərrəmlik ayının keçirilməsi ilə bağlı Qafqaz Müsəlmanları İdarəsinin Qazilər Şurası fətva verib: "Fətvada birmənalı göstərilib ki, bu və ya digər ayinlər həyata keçirilərkən qanuna əməl edilməlidir. Eyni zamanda, Azərbaycanda məscidlərdə bu və ya digər ayinlər həyata keçirilərkən QMİ-nin tətbiq və təqdim etdiyi təqvimə əməl olunmalıdır. Bu təqvimdən kənara çıxmaq olmaz. Çünki ölkəmizdə QMİ-nin tərtib etdiyi təqvim məscidlərə aiddir. Məzhəbindən asılı olmayaraq, bütün məscidlər bu təqvimlərə əməl etməlidir. Komitənin yerlərdə olan şöbələri buna əməl edilməsi ilə əlaqədar monitorinqlər keçirəcək. Əgər hər hansı pozuntular olsa, onunla əlaqədar müvafiq tədbirlər görüləcək".
İlahiyyatçı İsmayıl Əhməd "Bakı-Xəbər"ə açıqlamasında qeyd etdi ki, dini ayinlərin evlərdə keçirilməsi düzgün deyil: "Əvvəllər evlərdə dini mərasimlər təşkil olunurdu. Yaxınların və dindarların iştirakı ilə evlərdə imam ehsanı verilirdi. Amma zaman keçdikcə, tələbat və şərait dəyişdiyi üçün dini xarakterli ayinlərin evlərdə keçirilməsinin düzgün olmadığına dair fətva verilib. Belə məclislərdən istifadə edib insanlara müxtəlif fikirləri təlqin edirlər. İnsanları yanlış yola çəkmək istəyirlər. Bu səbəbdən də belə bir fətvanın verilməsi məqsədyönlüdür. Mən bu qərarı dəstəkləyirəm. Dini mərasimlər yalnız məscidlərdə keçirilməlidir".
Günel CƏLİLOVA
