Məhərrəm Zülfüqarlı: "Bütün ali təhsil ocaqları tələbə kredit fonduna qoşulsun və ya hər bir universitet özü üçün belə bir fond yaratsın"
Ali məktəblərin ödənişli ixtisasına qəbul olunanlar təhsil haqqını ödəməkdə çətinlik çəkir. Bəllidir ki, bank sektorunda yaşanan problemlər üzündən kredit verilişi, demək olar ki, dayandırılıb. Övladının təhsil haqqını ödəməkdə çətinlik çəkənlər həm mənəvi, həm də maddi sıxıntı yaşayır.
Tələbələrin belə bir sıxıntıdan azad olunması üçün Təhsil Nazirliyinin təşəbbüsü ilə Maarifçı Tələbə Kredit Fondu yaradıldı. Fond dövlət ali təhsil müəssisələri tərəfindən təsis olunub. Fondun əsas missiyası təhsil haqqını ödəməkdə çətinlik çəkən aztəminatlı ailələrdən olan tələbələrə uzunmüddətli güzəştli kreditlər verilməsi vasitəsilə onlara ali təhsil almaqda bərabər imkanların yaradılmasıdır.
Qeyd edək ki, Maarifçi Tələbə Kredit Fondu 10 təhsil müəssisəsi - Azərbaycan Dillər Universiteti, Azərbaycan Dövlət Pedaqoji Universiteti, Azərbaycan Dövlət Neft və Sənaye Universiteti, Azərbaycan Texniki Universiteti, Azərbaycan Dövlət İqtisad Universiteti, Azərbaycan Memarlıq və İnşaat Universiteti, Bakı Dövlət Universiteti, Bakı Slavyan Universiteti, Gəncə Dövlət Universiteti və Sumqayıt Dövlət Universiteti tərəfindən təsis olunub.
Digər ali təhsil müəssisələri də belə bir fond yarada və ya yaradılan Maarifçi Tələbə Kredit Fonduna üzv ola bilərmi? Təhsil eksperti Məhərrəm Zülfüqarlı qəzetimizə açıqlamasında qeyd etdi ki, tələbələrə dəstək olmaq məqsədilə belə bir fondun yaradılması müsbətdir: "Yaxşı olar ki, bütün ali təhsil ocaqları tələbə kredit fonduna qoşulsun və ya hər bir universitet özü üçün belə bir fond yaratsın. Tələbələrə verilən təhsil krediti borc mənasını daşıyır. Tələbə universiteti bitirəndən sonra o krediti və üstəlik, onun faizini ödəməkdə çətinlik çəkəcək".
Həmsöhbətimiz təklif edir ki, aztəminatlı ailələrin maddi durumu nəzərə alınıb onların övladlarının təhsil haqqı azaldılsın: "İndi ailələrin sosial durumu normal deyil. Əksər ailələr bankdan kredit götürüb. Üstəlik, təhsil kreditini də götürsələr, o ailələrin durumunu təsəvvür etmək çətin deyil".
Günel CƏLİLOVA
