Azər Allahverənov: "Nəqliyyat nizamsızlığını aradan qaldırmaq üçün taksi dayanacaqlarının yaradılmasına ehtiyac var"
Paytaxt küçələrində müşahidə olunan nəqliyyat sıxlığının qarşısını almaq məqsədilə Bakıda xüsusi taksi dayanacaqlarının yaradılmasına başlanıb. Bu barədə Bakı Nəqliyyat Agentliyinin ictimaiyyətlə əlaqələr şöbəsinin sektor müdiri Mais Ağayev media nümayəndələrinə açıqlamasında məlumat verib.
O bildirib ki, agentlik əməkdaşları Bakıda taksi dayanacaqlarının fəaliyyət göstərməsi üçün yerlərin müəyyənləşdirilməsinə başlayıb: "Adətən taksi sürücüləri əhalinin gur olduğu ticarət mərkəzləri və digər obyektlərin qarşısında dayanmaq istəyir ki, müştəriləri rahatlıqla cəlb edə bilsin. Amma bu proses şəhərdə tıxacların yaranmasına səbəb olur. Bunun üçün xüsusi taksi dayanacaqları müəyyənləşdiririk. Dayanacaqlar şəhərdən kənarda olmamalı, digər tərəfdən isə hərəkətə maneçilik yaratmamalıdır. Artıq bununla bağlı bir neçə yer müəyyən edilib. Yaxın vaxtlarda taksilər həmin dayanacaqlara cəlb ediləcək. Bu dayanacaqlardan kənarda taksilərin fəaliyyəti qanunsuz hesab ediləcək".
Nəqliyyat sıxlığının qarşısını almaq məqsədilə xüsusi taksi dayanacaqlarının yaradılmasının müsbət nəticələrə səbəb olacağını bildirən sosial sahə üzrə ekspert Azər Allahverənov qəzetimizə açıqlamasında qeyd etdi ki, şəhərin istənilən küçəsində nizamsız şəkildə fəaliyyət göstərən taksi dayanacaqlarına rast gəlinir: "Sərnişinlər şəhərin istənilən ərazisində taksi saxlatdırır. Həmçinin, taksilər də paytaxtın müxtəlif ərazilərində dayanıb müştəri gözləyir. Bu kimi hallar yollarda böyük sıxlığın yaranmasına səbəb olur. Hətta avtobus dayanacaqlarının da taksilər tərəfindən tutulduğunun şahidi oluruq. Belə bir vəziyyətdə xüsusi taksi dayanacaqlarının yaradılması ideyası müsbətdir. Bildirilir ki, Bakı şəhərinin müxtəlif ərazilərində taksi dayanacaqları inşa ediləcək. Taksilər həmin dayanacaqlarda dayanaraq öz müştərilərini gözləyə bilər. Ancaq o taksi dayanacaqları elə yerdə salınmalıdır ki, yol infrastrukturu buna imkan versin. Həmin taksi dayanacağı digər nəqliyyat vasitələrinin hərəkətinə mane olmamalıdır".
Həmsöhbətimiz hesab edir ki, nəqliyyat nizamsızlığını aradan qaldırmaq üçün taksi dayanacaqlarının yaradılmasına ehtiyac var. Taksilər bilməlidir ki, onların dayanacaq yeri haradır.
Günel CƏLİLOVA
