Şahin Camalov: "Turistlərin daşınması ilə bağlı sürücülərin qarşısında yeni bir tələbin qoyulması müsbət qarşılanmalıdır"
Azərbaycanda turist və ekskursantların daşınmasını həyata keçirən sürücülərlə bağlı yeni tələblər tətbiq ediləcək. Milli Məclisdən mediaya verilən məlumata görə, bu yeni hazırlanan "Turizm haqqında" qanun layihəsində öz əksini tapıb.
Layihəyə görə, turist və ekskursantların daşınmasını həyata keçirən sürücülərin bilikləri nəzarət orqanı tərəfindən sertifikatlaşdırılmalıdır. Həmin sertifikatı əldə etməyən daşıyıcı turist və ekskursantların daşınması ilə məşğul ola bilməz.
Turist avtonəqliyyatı sürücüləri müvafiq icra hakimiyyəti orqanı tərəfindən peşə fəaliyyətinə və davranışına dair təsdiq olunmuş xüsusi proqram üzrə hazırlıq keçməlidir. Onlar həm də avtomobil nəqliyyatı ilə turistlərin və ekskursantların daşınmasını tənzimləyən normativ aktlar barədə zəruri biliklərə malik olmalıdır.
Layihəyə görə, turistlərin və ekskursantların daşınması üçün daşıyıcılar müvafiq icra hakimiyyəti orqanlarının birgə müəyyən etdiyi qaydada akkreditasiyadan keçməli və akkreditasiya kartları ilə təmin olunmalıdır.
Avtomobil nəqliyyatı ilə daşıma xidmətləri göstərən şəxs buna görə lisenziya aldıqdan sonra turistləri və ekskursantları daşıma sahəsində işləmək üçün nəzarət orqanının nümayəndələrinin iştirakı ilə akkreditasiyadan keçməlidir.
Turistlərin daşınmasını həyata keçirəcək daşıyıcının xüsusi sertifikatının olması müsbət qarşılanır.
"Təhlükəsizlik Yol" Alyansının koordinatoru Şahin Camalov "Bakı-Xəbər"ə açıqlamasında qeyd etdi ki, turistlər xüsusi daşıyıcı şirkətlər tərəfindən daşınmalıdır: "Xatırladım ki, ölkəmizdə ərəb turistlərini daşıyan avtobus qəzaya uğramışdı. Bu qəza zamanı xəsarət alanlar da olmuşdu. Universitet müəllimlərini regionlardan birinə istirahət üçün aparan avtobus da qəza törətmişdi. Bu kimi hadisələr turistlər üçün ayrıca daşıyıcının olmasını gündəmə gətirib".
Ş.Camalovun sözlərinə görə, turistlərin daşınması ilə bağlı sürücülərin qarşısında yeni bir tələbin qoyulması müsbət qarşılanmalıdır: "Nəzərə almaq lazımdır ki, ölkəyə gələn turistlərin təhlükəsizliyi yüksək səviyyədə təmin olunmalıdır. Tək turistlərin deyil, eyni zamanda, ölkə vətəndaşlarının da təhlükəsizliyinin təmin olunması üçün sürücülərin xüsusi sertifikata malik olmasını yalnız alqışlamaq lazımdır".
Günel CƏLİLOVA
