Seyid Camal Əzimbəyli: "Bununla bağlı səslənən fikirləri müvafiq qurumlar ciddi dəyərləndirməlidir"
"Azərbaycana turist kimi gələn, amma dini məsələlərə qarışan qonaqlar diqqətdə saxlanmalıdır". Bunu Qafqaz Müsəlmanları İdarəsinin sədri Allahşükür Paşazadə deyib. Onun sözlərinə görə, gələn qonaq sakitcə məsciddə namaz qılıb gedərsə, bu problem deyil: "Amma elə qonaqlar olur ki, dini işlərə qarışır. Təriqət məsələlərini qabartmaq və qarışıqlıq salmaq istəyirlər. Buna yol vermək olmaz. Onlar Azərbaycanda qarışıqlıq salmaqla fəlakətə səbəb olacaqlarsa, gətirdikləri sərmayə lazım deyil".
QMİ sədrinin Azərbaycana axın edən turistlər barədə verdiyi açıqlama müzakirələrə səbəb olub. QMİ rəhbərinin ölkəmizdə olan turistlərdən narahatlığı maraq doğurmaya bilməz. Onun fikirləri ətrafında mövqelər müxtəlifdir. Bir qisim hesab edir ki, şeyxdə Azərbaycanda olan ərəb turistlərinin dini proseslərə müdaxilə edə biləcəyi barədə xəbərlər var və QMİ rəhbəri bundan çıxış edərək narahatlığını dilə gətirir. Digər bir qisim isə düşünür ki, ölkəmizə gələn müsəlman turistlərin bir çoxunun sünni məzhəbinə, bəzilərinin isə radikal dini cərəyanlara aid olması səbəbindən şeyx əsasən şiə ölkəsi olaraq Azərbaycanda bunun ciddi fəsadlar törədə biləcəyini zənn edir.
Bütün hallarda, sözügedən turistlərlə bağlı səslənən fikirlər nə dərəcədə realdır?
Şərqşünas Seyid Camal Əzimbəyli sözügedən məsələ ilə bağlı ifadə olunan narahatlığı bölüşdüyünü bildirdi: "Məsələ ondadır ki, Allahşükür Paşazadə kifayət qədər təcrübəli və məlumatlı bir adamdır. O baxımdan düşünürəm ki, onun hansısa informasiyası olmasa belə danışmaz. Ona görə də onun bununla bağlı məlumatı varsa və söyləyirsə, deməli, burada məntiq var. Bütün bunlardan çıxış edərək hesab edirəm ki, bununla bağlı səslənən fikirləri müvafiq qurumlar ciddi dəyərləndirməlidir. Bununla bağlı müvafiq qabaqlayıcı addımlar atılmalıdır. Nəzərə almaq lazımdır ki, bir vaxtlar Suriyaya turist adı ilə gedənlər bu ölkədə böyük fəlakətlər törətdilər. Ona görə də məsələyə son dərəcə diqqətlə yanaşmaq lazımdır".
Vidadi ORDAHALLI
