Vaqif Qarayev: "İnsanın oriyentasiyası, düşüncəsi, hərəkətləri adekvatdırsa, o necə sərxoş ola bilər?"
Spirtli içki qəbul edərək avtomobil sürmək dünyanın hər bir ölkəsində qanunsuz hərəkət kimi qəbul olunur. Sürücü spirtli içki içib sükan arxasına keçibsə, inzibati qaydada məsuliyyət daşıyır. Bu gün sərxoş halda avtomobili idarə edənlərə qarşı müəyyən cəzalar tətbiq olunur.
Ancaq bəzən elə hal olur ki, sürücü az miqdarda spirtli içki qəbul etdiyi üçün sərxoş olmadığını deyir. Hətta bir gün öncə alkoqol qəbul edən şəxs növbəti gün yol polisi əməkdaşları tərəfindən saxlandıqda bu zaman onlar arasında narazılıq yaranır. Narazılığın səbəbi aydındır. Sürücü az miqdarda alkoqol qəbul etdiyini deyir, yol polisinin əməkdaşları isə bildirir ki, miqdardan asılı olmayaraq, sükan arxasına keçən şəxs spirtli içki qəbul edibsə, sərxoş sayılır.
Bizim üçün maraqlıdır, sükan arxasında əyləşən şəxs təxminən nə qədər spirtli içki qəbul etdikdə sərxoş ola bilir? Məsələ ilə bağlı həkim Vaqif Qarayevə müraciət etdik. O, "Bakı-Xəbər"ə açıqlamasında qeyd etdi ki, tibbi baxımdan ağızdan alkoqol iyi gəlməsi sürücünün sərxoş olmasına dəlalət etmir: "Sürücü iki gün əvvəl alkoqol qəbul edibsə, bu o demək deyil ki, o sərxoşdur. İnsanın oriyentasiyası, düşüncəsi, hərəkətləri adekvatdırsa, o necə sərxoş ola bilər? Amma yol polisi qanundakı həmin promillidən çıxış edərək sürücünü sərxoş hesab edir. Yaxud sürücünün mədəsində problem varsa, onun ağzından iki gün alkoqol iyi gələ bilər, ancaq o şəxs əslində sərxoş deyil. Bir məqamı da qeyd edim ki, bu qəbul olunmuş qaydadır. Yəni alkoqolun izi təxminən 40 günə qədər qara ciyərdə qala bilir. İndi bu adamın qanı yoxlansa, onu sərxoşmu hesab etməliyik? Yəni sərxoşluğun tibbi konstatasiyasi təkcə normativ rəqəmlə yox, həm də adekvatlığın olmasi ilə təyin olunur. Sovet vaxtı yazırdıq ki, "ağzından alkoqol iyi gəlir, amma sərxoş deyil". Ancaq indi bu vəziyyətə necə əməl olunur məlumatım yoxdur".
Günel CƏLİLOVA
