Aysel Zeynalova: "Belə uşaqlarda nevroloji problemlər aşkar olunur"
"Bütün dünyada olduğu kimi, Azərbaycanda da qeysəriyyə əməliyyatı ilə anadan olan uşaqlarda nevroloji patologiyalar artıb". Bunu Bakı Sağlamlıq Mərkəzinin direktor müavini Cəmilə Ağazadə media nümayəndələrinə açıqlamasında bildirib.
Onun dediyinə görə, son illər ölkədə qeysəriyyə əməliyyatlarının sayı azalıb. Belə ki, təkcə Azərbaycanda yox, bütün dünyada qeysəriyyə əməliyyatlarının sayının azalması üçün tədbirlər görülür. O vurğulayıb ki, hamiləlik gedişatının izlənməsi, hamilələrə qulluğun normal aparılması qeysəriyyə kəsiyi əməliyyatlarının sayının azalması ilə nəticələnib: "Mərkəzdə ana və uşaq sağlamlığı diqqət mərkəzində saxlanır. Mərkəzdə ana və uşaq ölümü 0 %-dir. Ağır patologiyası olan xəstələr də tam sağlam şəkildə evə yazılıb".
Mövzu barədə fikir bildirən pediatr Aysel Zeynalova bizimlə söhbətində qeyd etdi ki, qeysəriyyə kəsiyi əməliyyatı ilə doğulmuş uşaqlar daha çox patologiyalarla qarşılaşır: "Əməliyyatla doğulan uşaqlarda daha çox tənəffüs yolu xəstəlikləri, kəllə-beyin zədəsi, sinir sistemi və həzm prosesinin pozulması hallarına rast gəlinir. Bu körpələr allergik xəstəliklərə daha çox meylli olur.
Qeysəriyyə yolu ilə dünyaya gələn uşaqlar əsəbi olur. Bunun səbəbi isə onların dünyaya gəlməyə hazır olmaması ilə bağlıdır. Təbii yolla doğulan uşaqlar artıq ana bətnindən azad olub həyata qatılacağını hiss edir. Ancaq qeysəriyyə kəsiyi ilə doğulan uşaqlarda vəziyyət fərqlidir. Bir anın içərisində uşaq ana bətnindən ayrılır. Döl bətndən ayrılmağa hazır olmadığı üçün əksər uşaqlarda nevroloji problemlər aşkar olunur".
Həmsöhbətimiz onu da diqqətə çatdırdı ki, qeysəriyyə əməliyyatı ilə doğulan uşaqlarda astma probleminin yaranma ehtimalı daha yüksəkdir: "Təbii doğuş zamanı uşaq dölyanı mayedən quruya yavaş-yavaş çıxır. Əməliyyatla isə uşaq quruya birbaşa çıxarıldığına görə belə uşaqlarda astma problemi ola bilər. Onlarda immun sistemi çox zəif olur, hər cür xəstəliyə yoluxma risqləri var".
Günel CƏLİLOVA
