Məlahət Mürşüdlü: "Məktəblilərə digər ölkələrin tarixi, coğrafiyasını öyrədirik, eyni zamanda, uşaqlara digər ölkələrin dini tarixini də tədris etməliyik"
Dini biliklərin orta məktəbdə tədrisi "Həyat bilgisi" fənni çərçivəsinə salınsa da, onun genişləndirilməsinə ehtiyac var. Dini Qurumlarla İş üzrə Dövlət Komitəsi belə bir təklif hazırlayaraq Təhsil Nazirliyinə göndərib. Orta məktəblərdə tədris olunan "Həyat bilgisi" dərsliyində dini biliklərə daha geniş yer veriləcək.
Dini Qurumlarla İş üzrə Dövlət Komitəsində hesab edirlər ki, dərsliklərə dəyişikliklər etməyə ehtiyac var. Kitaba islam dini ilə yanaşı, digər dinlər haqqında da ətraflı biliklərin salınması təklif edilir.
Dini Qurumlarla İş üzrə Dövlət Komitəsi sədrinin müavini Gündüz İsmayılov media nümayəndələrinə açıqlamasında deyib ki, Təhsil Nazirliyinə göndərilən təkliflərdə şəriət və ya dinin tədrisi deyil, dini biliklərin daha da dərinləşdirilməsi önə çəkilib.
Məsələ ilə bağlı fikir bildirən Azad Müəllimlər Birliyinin rəhbəri, təhsil sahəsi üzrə ekspert Məlahət Mürşüdlü "Bakı-Xəbər"ə açıqlamasında qeyd etdi ki, din əxlaq və mənəviyyat dərsi olaraq tədris olunmalıdır: "Orta məktəblərdə din dərsi şəriətdən, fanatizmdən uzaq formada tədris olunmalıdır. Təcrübələrə əsaslansaq deyə bilərik ki, dinin elmi əsaslarının orta məktəblərdə öyrədilməsinə ehtiyac var. İslam dini ilə yanaşı, digər dinlər haqqında məlumatlar da şagirdlərə aşılanmalıdır. Məktəblilərə digər ölkələrin tarixini, coğrafiyasını, iqtisadiyyatını öyrədirik. Eyni zamanda, uşaqlara digər ölkələrin din tarixini də tədris etməliyik. Din haqqında anlayışı olmayan gənclər müxtəlif sektalara, təriqətlərə qoşulur. Əslində o gənclər həmin sektaların mahiyyətini bilmədən ora üzv olur. Bu səbəbdən də düşünürəm ki, orta məktəblərdə uşaqlara din haqqında geniş bilgi verilməlidir".
Ekspertin fikrincə, din dərsi aşağı siniflərdən başlayaraq yuxarı siniflərə qədər müəyyən ardıcıllıqla davam etməlidir.
Günel CƏLİLOVA
