Samir Əliyev: "Arıçılığın inkişafı üçün arıçılar assosiasiyasının təsis edilməsinə böyük ehtiyac var"
Azərbaycan Respublikası Sahibkarlar (İşəgötürənlər) Təşkilatları Milli Konfederasiyasında İqtisadi Təşəbbüslərə Yardım İctimai Birliyinin Sahibkarlığın və Bazar İqtisadiyyatının İnkişafına Yardım Fondu "Azərbaycanda arıçılıq sektorunun iqtisadi perspektivləri" adlı "dəyirmi masa" keçirib. Tədbirdə 20-dən çox arı təsərrüfatı ilə məşğul olan ASK-nın üzvləri iştirak edib.
Arıçılıqda mövcud vəziyyət müzakirə olunmaqla yanaşı, bir çox problemlərdən də söhbət açılıb. Qeyd olunub ki, bu sahədə inkişaf üçün arıçılar assosiasiyasının təsis edilməsinə böyük ehtiyac var. Hazırda pərakəndə fəaliyyət göstərdiklərini təsdiqləyən arıçılar arıların vahid dövlət qeydiyyatına alınmasınan vacibliyini dilə gətirib.
Ekspertlər də arıçılıq təsərrüfatının inkişafı üçün arıçılar assosiasiyasının yaradılmasının vacib olduğunu bildirir.
Aqrar sahə üzrə ekspert Çingiz Fərəcov "Bakı-Xəbər"ə açıqlamasında bildirdi ki, arıçılıq kənd təsərrüfatının mühüm sahələrindən biridir: "Azərbaycanın florası imkan verir ki, arıçılıq sürətlə inkişaf etdirilsin. Hazırda Azərbaycanda 250 min arı ailəsi var. Yaxın gələcəkdə bu sayı 500 minə çatdırmaq mümkündür. Mən sizə deyim ki, hər il respublikada 2000-2500 ton bal istehsal olunur. Lakin bu il ölkədə bal çox az istehsal olundu. Normadan artıq yağışın yağması və yayın çox isti keçməsi nəticəsində çiçəklər quruyaraq tökülüb. Beləliklə, arılar nektar toplaya bilməyib".
Həmsöhbətimizin sözlərinə görə, aidiyyəti qurumlar bal yarmarkası keçirmək istəyir: "Mənə maraqlıdır, respublikada bal az olduğu halda 300-400 nəfər yarmarkaya hansı balı çıxaracaq? Çox təəssüflər olsun ki, arıçılar arasında süni bal düzəldənlər çoxdur. Onlar da hazırladığı saxta balı yarmarkaya gətirir".
Ç.Fərəcov qeyd etdi ki, hazırda ölkədə 4 arıçılar cəmiyyəti mövcuddur. "Respublika Arıçılar" , "Qızıl Pətək" Arıçılar, "Dağ Arıçıları" və "Arı Sevənlər" cəmiyyətləri fəaliyyət göstərir: "Bu cəmiyyətlər arıçılıqda yaşanan problemləri araşdırıb müəyyən işlər görür".
İqtisadçı-ekspert Samir Əliyevin sözlərinə görə, Azərbaycanda 10 000 arı təsərrüfatı, 250 000 arı ailəsi var: "Ən ucuz bal Avstriyada, ən baha bal isə Fransadadır. Dünyada ən çox bal istehsal edən ölkə Çin, Argentina, Meksika, Hindistan, Vyetnam, ən çox bal ixrac edən ölkə isə ABŞ, Almaniya, Böyük Britaniya, Yaponiya, Belçikadır.
Bu sahədə inkişaf üçün arıçılar assosiasiyasının təsis edilməsinə böyük ehtiyac var".
Günel CƏLİLOVA
