Vaqif Qarayev: "Hava-damcı yolu ilə, kontaktla və ya xəstənin qanı ilə keçən xəstəliklərin torpaq altında heç bir qorxusu yoxdur"
Məlum olduğu kimi, Azərbaycanda məzarlıqlarla bağlı qanun layihəsi hazırlanır. Həmin qanun layihəsində bir sıra məsələlər yer alıb. Bu məsələlərdən biri də təhlükəli xəstəlik daşıyıcıları vəfat edəndən sonra onların nəşinin yandırılmasıdır.
Milli Məclisin İctimai birliklər və dini qurumlar komitəsinin sədri Siyavuş Novruzov mətbuata açıqlamasında bildirib ki, elə xəstələr var ki, onları basdırmaq olmaz, nəşi yandırılmalıdır: "Çünki elə xəstəliyin daşıyıcısı ola bilər ki, torpağa qarışdıqdan sonra yayılma ehtimalı böyük ola bilər. Ona görə layihədə təhlükəli xəstəlik daşıyıcısı olan ölənin nəşinin yandırılması məsələsi də əksini tapıb".
Məsələ ilə bağlı fikir bildirən həkim Vaqif Qarayev "Bakı-Xəbər"ə açıqlamasında bəzi xəstəliklərin müxtəlif yollarla keçdiyini dedi. Onun sözlərinə görə, elə xəstəliklər var ki, hava-damcı yolu ilə, bəziləri kontaktla, bəziləri isə birbaşa xəstənin qanı ilə təmasda olanda başqa bir şəxsi yoluxdurur: "Bu xəstəlik daşıyıcılarının nəşini yandırmağın nə mənası var? Torpağın altında bu xəstəliklər qorxusuzdur. Məsələn, quduz it insanı bu xəstəliyə yoluxdurursa, o öldürülür və torpağa basdırılır. Eynilə bu xəstəlikdən ölənlər də torpağa basdırılır".
Həmsöhbətimiz onu da əlavə etdi ki, xüsusi təhlükəli xəstəliklər var ki, bu xəstəliklərin daşıyıcıları vəfat edəndən sonra yandırılır: "Bunlardan taun və vəbanı deyə bilərəm. Taundan ölənlərin meyiti bəzi ölkələrdə yandırılır. Bəzi ölkələrdə isə həm meyit, həm də basdırıldığı torpaq xüsusi maddələrlə dezinfeksiya olunur, sonra dərin basdırılır. Şükür Allaha ki, bizdə belə xəstəliklər yoxdur. İndi bilmirəm bizimkilər hansı xəstəlikləri nəzərdə tutub meyiti yandırmaq istəyir?!".
Günel CƏLİLOVA
