Əhməd Qəşəmoğlu: "Hazırda telekanallarda yayımlanan yumoristik seriallarda serial fəlsəfəsinin əksi nümayiş olunur"
"Azərbaycanda özəl telekanallarda yayımlanan yumoristik serialların çoxunun ssenarisi və süjet xətti ailə ənənələrimizə və milli-mənəvi dəyərlərimizə ziddir. Bəzi yumoristik serialların məzmununda güldürmək xatirinə Azərbaycan ailəsi üçün qeyri-ənənəvi hallar müşahidə olunur".
Bu sözləri Milli Televiziya və Radio Şurasının monitorinq şöbəsinin sədri Təvəkkül Dadaşov media nümayəndələrinə açıqlamasında deyib. T.Dadaşovun sözlərinə görə, yumoristik serialların ssenarisində bu cür nöqsanlarla bağlı telekanallara xəbərdarlıq olunub: "Amma biz yenə də xüsusilə yumoristik seriallarda güldürmək xatirinə milli dəyərlərimizə, ailə institutumuza zidd məqamlarla, süjetlərlə rastlaşırıq. Bir də görürsən ki, yumoristik serialda iki qardaş öz bacısını ərə vermək üçün yoldan keçən, tanımadığı şəxsi qapıdan içəri salır ki, bacısı ərə getsin. Axı bu cür hallar bizim ailə dəyərlərimizdə yoxdur. Bunlar Azərbaycan ailəsi üçün qeyri-ənənəvi hal hesab olunur. Azərbaycan ailəsində hansı qardaş bacısını bu cür yolla ərə verir? Bu cür ailə dəyərlərimiz üçün qeyri-ənənəvi halları güldürmək xatirinə seriallarda göstərmək mənəvi dəyərlər aspektindən yolverilməzdir".
Mövzu barədə fikir bildirən sosioloq Əhməd Qəşəmoğlu "Bakı-Xəbər"ə açıqlamasında qeyd etdi ki, Azərbaycan telekanallarında yayımlanan serialların vəziyyəti qeyri-qənaətbəxşdir: "Əslində serialın əsas fəlsəfəsi olur. Təəssüf ki, bu gün rejissorlarımızın bu fəlsəfədən xəbəri yoxdur. Serial ona görə çəkilir ki, ölkədə əhalinin müəyyən bir sahədə mentaliteti olur. O mentaliteti yaxşılığa doğru dəyişmək üçün teleseriallar çəkilir. Yəni məqsəd teleserialların həmin mentaliteti arzuolunan formada dəyişməsidir. Serialın əsas mahiyyəti budur. Bizim rejissorlar isə çalışır ki, hansısa türk və Latın Amerikası seriallarının oxşarını bizdə yaratsın".
Həmsöhbətimiz xüsusi olaraq vurğuladı ki, hazırda telekanallarda yayımlanan yumoristik seriallarda serial fəlsəfəsinin əksi nümayiş olunur: "Yumoristik seriallarda elə səhnələr var ki, biz o kadrlarla, demək olar ki, düşmən dəyirmanına su tökürük. Düşmən ölkə istəyir ki, bizim əhalinin mentalitetində neqativ dəyişiklik etsin. Millətini sevən hər bir kəs bu cür səhnələrə diqqət etməlidir".
Müsahibimizin sözlərinə görə, seriallar əhalinin mənəvi aləmini formalaşdırır: "Əhalinin mənəviyyatını mənasız seriallarla korlamasınlar".
Günel CƏLİLOVA
