Rəsul Cahangirli: "İlbəil hepatit virusuna yoluxanlar artır"
Azərbaycanda müəyyən xəstələr var ki, onların müalicəsi dövlət proqramları çərçivəsində həyata keçirilir. Ölkədə müəyyən dövlət proqramları çərçivəsində xəstələrə pulsuz dərmanlar verilir. Belə ki, 10 dövlət proqramı üzrə müəyyən qrup xəstələrə pulsuz dərmanlarla təmin olunması üçün dövlət büdcəsindən vəsait ayrılır.
Bunlara "Onkoloji xəstələrin şiş əleyhinə əsas preparatlarla təminatı üzrə Tədbirlər Proqramı", "Hemofiliya və talassemiya irsi qan xəstəlikləri üzrə Dövlət Proqramı", "Xroniki böyrək çatışmazlığı üzrə Tədbirlər Proqramı", "Yoluxucu xəstəliklərin immunoproflaktikasına dair Tədbirlər Proqramı", "Qanın, qan komponentlərinin donorluğu və qan xidmətinin inkişafına dair Dövlət Proqramı", "Şəkərli diabet üzrə Dövlət Proqramı", "Azərbaycan Respublikasında HİV/AİDS-in qarşısının alınması və onunla mübarizə", "Vərəmlə mübarizə üzrə Tədbirlər Proqramı", "Dağınıq skleroz xəstəliyinə tutulmuş şəxslərin dövlət tibb müəssisələrində müayinə və müalicəsinin maliyyələşdirilməsi qaydası" və "Dağınıq skleroz xəstəliyinə tutulmuş şəxslərə göstərilməli olan tibbi yardımın həcmi və keyfiyyət standartları", "Ana və uşaqların sağlamlığının qorunması üzrə Dövlət Proqramı" daxildir.
Bu günlərdə akademik, Milli Məclisin Səhiyyə komitəsinin sədri Əhliman Əmiraslanov maraqlı təkliflə çıxış edib. Təklifin mahiyyəti ondan ibarətdir ki, hepatit virusuna yoluxanlar da dövlət proqramının təminatına alınsın.
Sözügedən məsələ ilə bağlı fikirlərini "Bakı-Xəbər"lə bölüşən ekspert Rəsul Cahangirlinin sözlərinə görə, buna ciddi ehtiyac var: "Məsələ ondadır ki, istər Azərbaycanda, istərsə də digər ölkələrdə hepatit virusuna yoluxmada artım tendensiyası müşahidə olunur. İlbəil bu virusa yoluxanlar artır. Bunun müxtəlif obyektiv və subyektiv səbəbləri var. Necə deyərlər, bu qlobal bir problemdir. Müxtəlif səbəblərdən insanlar hepatit virusuna yoluxur. Ancaq ən başlıca problem ondan ibarətdir ki, bütün yoluxanlar müalicə oluna bilmir. Bir çoxlarının buna maddi imkanı çatmır. Çünki bunun müalicəsi o qədər də ucuz deyil. Bunun nəticəsində vəziyyət kritikləşir, xəstəlik kəskin fazaya keçir. Ona görə də həmin xəstələrin dövlət hesabına müalicə olunması məqsədəuyğundur".
Vidadi ORDAHALLI
