"Psixoloqların peşəkarlıq səviyyəsini tənzimləmək üçün düzgün proqram hazırlanmalı, psixoterapiya və danışmanlıq haqqında kurslar yaradılmalıdır"
Milli Məclisin Səhiyyə komitəsinin sədri Əhliman Əmiraslanov komitənin son keçirilən iclasında bildirib ki, "Psixoloji yardım haqqında", "Reproduktiv sağlamlıq haqqında" qanun layihələrinin Milli Məclisin payız sessiyasının müzakirəsinə çıxarılması nəzərdə tutulur.
Deputat qeyd edib ki, "Psixoloji yardım haqqında" qanuna böyük ehtiyac var: "Psixoloji yardım hər bir müəssisə üçün vacib komponentlərdən biridir. Dünyada istər özəl, istərsə də dövlət olsun, elə bir tibbi müəssisə tapılmaz ki, orada bir və ya bir necə psixoloq çalışmasın. Bu çox vacib məsələdir. Ancaq Azərbaycanda bu sahədə boşluq olduğundan, bu boşluğu bəzən təsadüfi adamlar doldurur. Bəzən onlar bu boşluqdan istifadə edib üzə çıxır".
Məsələ ilə bağlı fikir bildirən psixoloq Könül Vaqifqızı "Bakı-Xəbər"ə açıqlamasında psixoloji yardım sahəsində boşluq olduğunu etiraf etdi: "Bu gün insanlar psixoloji yardımla psixiatriyanın fərqini ayırd edə bilmir.
Təbii ki, bunların ayrı-ayrı sahələr olduğunu bu sahənin mütəxəssisləri ictimaiyyətə açıqlamalıdır. Etiraf etmək lazımdır ki, bu gün bəzi psixoloqların peşəkarlıq səviyyəsi qənaətbəxş deyil. Araşdırma aparılsa, ən yaxşılar sırasında çox az sayda psixoloji mərkəzlər seçilər. Psixoloji yardım mərkəzlərində çalışanlar savadlı və peşəkar olmalıdır. Bəzi hallarda özünü psixoloq adlandıran bir şəxs ofis açaraq psixoloji məsləhət verməyə başlayır. Seansın qiyməti də şişirdilir. Həmin psixoloqa müraciət edənlər də peşəkarlıq səviyyəsinin aşağı olmasını görür. Bunu tənzimləmək üçün düzgün proqram hazırlanmalı, psixoterapiya və danışmanlıq haqqında kurslar yaradılmalıdır".
Həmsöhbətimizin fikrincə, psixoloji yardım mərkəzlərində çalışan psixoloqlar eyni sahə üzrə mütəxəssis olmamalıdır: "Məsələn, psixoloqlar ailə-məişət, iş problemləri, idman sahəsi üzrə formalaşmalıdır. Yəni idman sahəsində işləyən hər hansı bir sıxıntı yaşayarsa, ailə-məişət problemləri üzrə çalışan psixoloqa deyil, sırf idman psixoloquna müraciət etsin".
Günel CƏLİLOVA
