Minilliklərin yaddaşından süzülüb gələn, xeyir-bərəkət, sevmək-sevilmək, dostluq, bərəkət rəmzi olan Novruzu qarşılamaq üçün təkcə paytaxtda deyil, ən ucqar kəndlərimizdə belə hazırlıq görülür, qoca-cavan-bir sözlə, hamı yazı qarşılamağa hazırlaşır. Suyun, odun, yelin gücü, nəvazişi ilə torpaq isindikcə təbiət canlanır, bərəkət rəmzi olan səmənilərlə birgə insanların arzusu, diləyi də sanki günbəgün boy atıb böyüyür.
Yenə bahar gəlib çölə, çəmənə,
Dağlarda, daşlarda yaz havası var.
Açan çiçəklərdə, uçan quşlarda,
Sevən ürəklərdə naz havası var.
Bu bir yarpaqlıq şeir də xatirimdə əbədi qalan bir Novruz axşamı yazılıb. Yaxşı ki, novruzlu xatirələrimiz var...
Çevrəmizdə baş verənləri gördükcə azad, abad bir ölkədə yaşamağın böyük bir xoşbəxtlik olduğunu anlayırıq. Sabitlik olan yerdə inkişaf da var, sağlam rəqabət də.
Hər Novruz gələndə böyüklərdən çox balacaların, uşaqların sevincinin yerə-göyə sığmadığının şahidi olmuşam. Günəş üzlü qoğallar, sirli-sehrli naxışları ilə xonçalara min bir rəng qatan şəkərburalar, Novruz süfrəsinin ən ləziz neməti olan paxlavalar, boyanmış yumurtalar onlara nağıllar aləmini xatırladır. Novruz indi onlar üçün gülüb-oynamaq, şənlənmək deməkdir. Böyüdükcə isə onun tariximizlə yaşıd olduğunu biləcəklər, öyrənəcəklər.
DİN-in Maddi-Texniki Təminat Baş İdarəsinin 2 saylı bağçasında keçirilən Novruz şənliyində balacaların baharı səsləmələri, yazı çağırmaları hər kəsə sevinc yaşatdı. Baharın şəninə oxunan mahnılarda, deyilən şeirlərdə balaca ürəklərin böyük sevgisini gördük. Bahar körpələrin dili ilə danışdı o gün. Hər xoş təbəssümdə bir zamanlar yaşanan ağrının, acının buz kimi əriməsinin şahidi olduq. Bağça müdirəsi Sevinc Məmmədəliyeva çiçək donlu, al-əlvan geyinən körpələrə üzünü tutub, anamız Yerin qucağını sevə-sevə açıb qarşılamağa hazırlaşdığı bahar bayramı münasibətilə onları təbrik edib tez böyümələrini, vətənə və xalqa gərəkli övlad olmalarını arzuladı. O bildirdi ki, Novruz min illər boyu xalqımızın yaddaşında özünə əbədiyyət qazanıb, deyimləri, duyumları, adət-ənənələri ilə bugünümzə qədər gəlib çatıb. Yeni gün, yeni ruzi anlamını özündə ehtiva edən bu bayram təkcə Azərbaycanda deyil, bir çox ölkələrdə də sevə-sevə qeyd olunur.
Təbiətin oyanması, torpağın canlanması, qaranquşların gəlişi Novruzun həm də bərəkət rəmzi olmasına bir işarədir və gələcəyimiz olan uşaqlar Novruzun mahiyyətini, onun sülh, dostluq, qardaşlıq bayramı olduğunu bilməlidir.
Çiçəkli Azərbaycana qədəmlərini sevgi ilə basan bahar körpələrin gülüşündə, səsində-küyündə daha gözəl görünürdü. Bayrama uşaqlardan çox müəllimləri hazırlaşmışdılar. Yetirmələrinin məsuliyyətini sanki bölüşmək istəyirdilər. Ayaq üstə, həyəcanla onlara baxır, uşaqlar nəyisə unudanda sanki özlərini günahkar bilirdilər. İki, üç, dörd yaşı olan körpələr üçün isə nə həyəcan vardı, nə də ki, utanmaq, çəkinmək...
Kosa ilə keçəl meydana girəndə düşündüm ki, balacalar qorxacaqlar, ancaq sən demə, onlar keçəli də tanıyırlarmış, kosanı da. Əlbəttə, tariximizi, adətimizi, ənənələrimizi uşaqlarımıza öyrədən, sevdirən müəllimlərin, tərbiyəçilərin - Azadə xanımın, Vüsalə xanımın, Mətanət xanımın, Uzeyfa xanımın, Gözəl xanımın, Rima xanımın, Sevda xanımın, Çimnaz xanımın, Nəzakət xanımın, Nataliya xanımın zəhmətini unutmaq olmaz. Çünki vətənə, xalqa sevgi hissini aşılamaq üçün adını çəkdiyimiz insanlar sözün əsl mənasında kirpiyi ilə od götürür. Bir deyil, iki deyil, onlarla uşağın təlim-tərbiyəsi ilə məşğul olmaq əsl fədakarlıqdır.
Novruzun atributları arasında bahar qızın yoxluğu duyulurdu. Kosanın bahar qızı çağırmaması, onun qışı tərifləməsi balaca qəhrəmanları elə hiddətləndirdi ki, kosa güclə qaçıb canını qurtardı və keçəlin bahar qızını sevə-sevə, uşaqlarla bir ağızdan meydana çağırması tədbirə bir başqa rəng qatdı. Bahar qızı güllə, çiçəklə, sovqatla uşaqların sevincinə səbəb oldu və Mehdinin, Kamranın, Anarın, Aliyənin, Aylinin dediyi şeirlər onu çox sevindirdi.
Körpələrimiz Azərbaycan musiqisinin şərəfi, himnimizin müəllifi böyük Üzeyir bəyi də yad etdilər. Böyük bəstəkarın "Arşın mal alan" əsərindən kiçik bir səhnəciyi ifa edən balacaların musiqi duyumu, hətta aktyorluq bacarıqları onların parlaq gələcəklərindən xəbər verirdi.
Bu yerdə bağçanın musiqi rəhbəri Zoya xanım Şıxbabayevanın adını çəkməsək olmaz. Əlbəttə, sevə-sevə görülən işin, çəkilən zəhmətin bəhrəsi də gözəl olur.
Şənliyin belə yaddaqalan olmasında, hər kəsə sevinc bəxş etməsində tərbiyəçi köməkçiləri Gülarə xanımın, Arzu xanımın, Mətanət xanımın, Günel xanımın, Maysara xanımın və bağçanın əlləri qızıl olan aşpazları Rahilə xanımla Telli xanımın da danılmaz əməyi var.
Novruz şənliyində balaca qəhrəmanlarımız qurşaq tutub güləşdilər də, yallı gedib doyunca oynadılar da. Həmkarlarımızın övladlarının Novruz şənliyində iştirak etmək, onu yazıya almaq isə mənə bir başqa zövq verdi.
Hafiz Təmirov,
polis mayoru
