Gəncdirlər, peşəkardırlar, müasir texnologiyalardan istifadə etməyi bacarırlar, bilik və bacarıqlarını təkmilləşdirmək üçün dünyanın bir çox nüfuzlu tibb ocaqlarında təlim keçiblər.
Adətən körpə uşaqların ağ xalat görəndə ağlamasını, qorxmasını hər birimiz müşahidə etmişik. Əslində, onların qorxmasının baiskarı biz böyüklərik. Sözümüzə baxmayanda, nadinclik edəndə onları həkimlə, iynə ilə qorxutmuşuq.
Ancaq bu dəfə hər şey tərsinə oldu. Müşahidə etdiklərimdən sonra bir daha qəti qərara gəldim ki, ünsiyyət zamanı psixoloji təsirin önəmi çox böyükdür.
Və diqqətimi çəkən əsas məqamlardan biri onların gələcəyimiz olan uşaqlarla həkim kimi deyil, həm də bir ana kimi ünsiyyət qurmaları oldu.
Əbəs yerə deməyiblər, həkimin, təbibin məlhəmindən, həbindən çox onun xoş sözü, səmimiyyəti xəstəni sağaldıb ayağa qaldırır.
Bəli, stressin, həyəcanın artdığı, kürəsəlləşmə deyilən ağır prosessin böyükdən-kiçiyə hər birimizin həyatına nüfuz etdiyi bir dövrdə gələcəyimiz olan uşaqlarımıza diqqət və qayğı göstərmək, onları sağlam canlı, sağlam ruhlu böyüdüb boya-başa çatdırmaq üçün üzərimizə düşən məsuliyyəti hiss etməliyik.
Bu gün ölkə Prezidenti cənab İlham Əliyevin apardığı siyasətin əsas prioritet istiqamətlərindən biri də məhz gələcəyimiz olan körpələrin qayğı ilə əhatə olunmasıdır ki, bu istiqamətdə də aidiyyatı qurumlar üzərlərinə düşən vəzifənin öhdəsindən layiqincə gəlməyə çalışırlar. Bağçalarda, məktəblərdə, bütün təhsil müəssisələrində yaradılmış yüksək şərait, müasir standartlara cavab verən idman kompleksləri uşaqların, gənclərin ixtiyarına verilib.
Sevindirici haldır ki, sabahımızı etibar etdiyimiz körpələrin, uşaqların qayğısı ilə savadlı, yüksək ünsiyyətqurma bacarığına malik, karyera qurmaq üçün, sözün əsl mənasında, sınaqlardan keçən gənclərimiz-həkimlər, müəllimlər və digər peşə sahibləri məşğul olurlar. Bütün bunlar isə şəffaflığın, inkişafın, biliyə və bacarığa verilən qiymətin, ali dəyərin bariz nümunəsidir...
Onlar da sınaqdan keçirdilər, daha doğrusu, sınaqdan keçmişdilər, bu dəfə öz məharətlərini göstərmək, DİN-in Təchizat İdarəsinin tabeçiliyində olan bağçalardakı körpə fidan balalarımızla daha yaxından tanış olmaq, onların sağlıq durumunu yoxlamaq üçün DİN-in Tibb İdarəsi tərəfindən səfərbər olunmuşdular.
"Tədbiri keçirməkdə məqsədimiz daxili işlər orqanları əməkdaşlarının övladlarının sağlıq durumunu diqqətdə saxlamaqdır. Pediatrik xidmətin keyfiyyətinin yaxşılaşdırılması üçün DİN rəhbərliyi tərəfindən müsabiqə yolu ilə DİO-ya qəbul edilən, DİN-in 1 və 2 nömrəli poliklinikalarında işlə təmin olunan gənc əməkdaşlarımızla birgə keçirilən bu tədbir həm də maarifləndirici xarakter daşıyır", - deyən DİN-in Tibb İdarəsinin rəisi, tibb xidməti polkovniki Mahmud Yusifov daxili işlər orqanları əməkdaşlarının, onların ailə üzvlərinin müayinəsinin və müalicəsinin aparılması üçün DİN-in Arif Heydərov adına respublika Hospitalında, poliklinikalarda müasir standartlara cavab verən yüksək şəraitin yaradıldığını və bu imkanlardan əməkdaşların yararlanmasının vacibliyini bildirdi.
O da qeyd olundu ki, yerlərə də məktublar göndərilib, əməkdaşların yaradılmış şəraitdən, xüsusən də övladlarının sağlamlığı üçüm pediatrik xidmətdən istifadə etmələri diqqətə çatdırılıb.
DİN-in Təchizat İdarəsinin tabeliyində olan bağçaların həkim-pediatrı Ayişə Dadaşova ilə birlikdə DİN-in 1 nömrəli poliklinikasının pediatrları Ülviyyə Həziyevanın, Könül Mirzəyevanın və DİN-in 2 nömrəli poliklinikasının pediartları Elnarə İbrahimovanın, Natavan Hüseynovanın DİN-in 1, 2, 3 və 4 saylı bağçalarında uşaqları müayinə edərkən bir daha şahidi oldum ki, gələcəyimiz olan körpələrimizin taleyi etibarlı əllərdədir.
Gəlin, övladlarımızın taleyinə biganə yanaşmayaq, onlarda müşahidə etdiyimiz kiçik bir problemin gələcəkdə qarşısı alınmaz xəstəliyə çevrilməmsi üçün savadlı mütəxəssislərə, həkim-pediatrlara müraciət edək.
DİN-in Tibb İdarəsinin general-leytenant Arif Heydərov adına Hospitalın, DİN-in 1 və 2 nömrəli poliklinikalarının tibb personalı təkcə polis əməkdaşlarının deyil, həmçinin xalqımızın sağlamlığının keşiyində durmağa hazırdırlar və buna da hər cür şərait var.
Yetər ki, biganə olmayaq, çünki can bizə İlahi tərəfindən verilən əmanətdir. Əmanətə isə xəyanət olmaz.
Hafiz Təmirov,
polis kapitanı
