"Qeyri-qanuni kabel şəbəkəsi yayımı ilə məşğul olanların siyahısını Daxili İşlər Nazirliyi, Baş Prokurorluq və Vergilər Nazirliyinə göndərmişik. Onlar haqda ciddi tədbirlər görüləcək". Bunu mediaya açıqlamasında Milli Televiziya və Radio Şurasının (MTRŞ) sədri Nuşirəvan Məhərrəmli deyib.
O bildirib ki, "Citynet"in abunəçi sayı digər qanunsuz kabel şəbəkəsi yayımı ilə məşğul olanların sayından qat-qat çoxdur: "İPTV" adı altında böyük bir şəbəkə qeyri-qanuni kabel yayımı ilə məşğul olur. Onlara qarşı ciddi tədbirlər görüləcək. "İPTV" anlayışına insanlar fərqli yanaşırlar. Bunu internetə müdaxilə kimi qəbul edirlər. Amma bunun internetlə heç bir əlaqəsi yoxdur. Onlar xüsusi ayrıca şəbəkə yaradıblar və həmin şəbəkə vasitəsilə gəlir əldə edirlər. Özü də bu, televiziya-radio yayımıdır. Əgər bir insan burdan gəlir əldə edirsə, ona uyğun olaraq da, qanunvericiliyin tələblərinə əməl etməlidir. Televiziya-radio yayımı lisenziyalaşdırılan sahədir. Ona görə də "İPTV" adı altında fəaliyyət göstərənlər lisenziya əldə etməlidir. Amma çox təəssüf ki, əvvəlcə gedib qeyri-qanuni fəaliyyət göstərirlər, sonra da lisenziya lazım olduğunu biləndə gəlib şantaj yolu ilə lisenziya almaq istəyirlər. Amma bu keçməz".
N.Məhərrəmli qeyd edib ki, dünya ölkələrində kabel şəbəkəsi yayımı ilə bağlı artıq müəyyən standartlar formalaşıb: "Hər bir ölkədə kabel şəbəkəsinin sayı yüzlərlə olmur ki. Kabel şəbəkəsinin sayı 3, 4, 5 və yaxud 6-dır. Kabel şəbəkəsini işlətmək o qədər də asan deyil. Bəziləri qeyri-qanuni yolla fəaliyyət göstərir və pirat yolla xarici telekanalların siqnallarını tutub əhaliyə 3-4 manata yayımlayır. Elə bilir ki, bu həmişə belə davam edəcək. Amma kabel şəbəkələrinin yayımı ilə məşğul olanlar xarici kanalların hər biri ilə müqavilə bağlayıb bu yayımı həyata keçirməlidirlər. Müqaviləyə görə də kabel şəbəkələri xarici kanallara pul ödəməlidirlər".
MTRŞ-dan APA-ya verilən məlumata görə, Azərbaycanda qanunsuz kabel şəbəkəsi yayımı ilə məşğul olanlar "Alfanet MMC", "Avirtel", "İzone MMC", "Azeronline", "Enginet.az", "Smart System technologys", "Global service Provider", "Eurosel, Uninet MMC", Bakı Telefon Rabitəsi İstehsalat Birliyi, "Aztelekom", "CityNet", "Smartonline.az", "Metronet", "Az-Evro Tel MMC", "Ott.az" və "GigaNet"dir.
Məsələ ilə bağlı fikir bildirən İKT sahəsi üzrə ekspert Osman Gündüz bizimlə söhbətində dedi ki, qanunsuz kabel şəbəkəsi yayımı ilə aidiyyəti qurumlar ciddi şəkildə məşğul olmalıdır. Onlara qarşı ciddi və sərt tədbirlər görülməlidir: "Bəzi kabel televiziyaları qanunsuz olaraq hansısa xarici ölkənin siqnallarını tutur. Sonra həmin siqnalları əhaliyə müəyyən məbləğdə satırlar. Təbii ki, bu hərəkət qanuna ziddir. Bu işlə məşğul olanlar cəzalandırılmalıdır".
Ekspert hesab edir ki, kabel televiziyası lisenziyalaşdırılmalıdır. Bu işlə məşğul olanlar qanunvericiliyin tələbinə uyğun olaraq lisenziya almalıdır.
O.Gündüz hesab edir ki, kabel televiziyası ilə bağlı müəyyən standartlar tətbiq olunmalıdır. Bu işlə məşğul olanlar həmin standartlara əsasən öz işlərini qurmalıdır.
Günel CƏLİLOVA
