Yumor - həyatdakı gülünc, komik hadisələri, insanların zəif cəhətlərini və nöqsanlarını əks etdirir. Bu gün bəzi telekanallarda müxtəlif məzmunlu yumoristik verilişlər yayımlanır. Ekspertlərin fikrincə, həmin verilişlərdə nümayiş olunan səhnələr qara yumordur. Və onlar bu tip verilişlərin efirdən yığışdırılmasının tərəfdarıdır.
Bu günlərdə Milli Televiziya və Radio Şurasının (MTRŞ) sədri Nuşirəvan Məhərrəmli mətbuata müsahibəsində bu məsələyə də toxunub. O qeyd edib ki, Azərbaycanda qara yumor efirdən silinməlidir: "Çox təəssüf ki, bizim gənc aktyorların çoxu özünü yumor sahəsində, pis tərəfdən göstərir. Əvvəllər küçə uşaqları tində lətifə danışardılar. İndi həmin lətifələri efirə gətiriblər. Bunlar efirdən birdəfəlik silinməlidir".
Azərbaycan Dövlət Akademik Milli Dram Teatrının aktyoru Anar Heybətov da "Bakı-Xəbər"ə açıqlamasında qeyd etdi ki,
bu gün bəzi telekanallar da qara yumor adı altında verilişlər yayımlanır. Aktyor hesab edir ki, həmin verilişlərə aidiyyəti qurumlar tərəfindən xüsusi nəzarət olunmalıdır: "Öz adıma deyə bilərəm ki, mən o tip verilişlərə baxarkən gülə bilmirəm. Güldürmək xətrinə bəzən tərəf-müqabillərini təhqir edirlər, bu da düzgün deyil. Komediya elə bir janrdır ki, buna baxarkən istər-istəməz insanın üzünə təbəssüm qonmalıdır. Necə ki, Çarli Çaplinə baxarkən insanların çöhrəsində gülüş olur. Yoxsa bizim bəzi verilişlərdəki kimi kimisə təhqir etməklə və ya bayağı ifadələr işlətməklə insanları məcburi güldürmək olmaz".
Sənətşünas Telman Ələkbərov bizimlə söhbətində bildirdi ki, qara komediya efirdən yığışdırılmalıdır. Onun sözlərinə görə, qara komediya küçələrdə olub və bu janr efir üçün deyil: "Təəssüf ki, indi bəzi gənclər bu janrı efirə gətirib çıxarıblar. Ola bilsin, çox az sayda tamaşaçı qara yumoru qəbul etsin. Amma mən əminliklə deyirəm ki, əhalinin əksər hissəsi qara komediyanı qəbul etmir. Və istəmir ki, onun övladı həmin verilişə baxıb hansısa təhqiramiz ifadəni eşitsin".
Həmsöhbətimiz onu da bildirdi ki, yumorun səviyyəli olması üçün həmin komik ifadəni səsləndirən şəxsin təhsili olmalıdır: "İnsan savadlı olanda onun yumor hissi də güclü olur. İfadəmə görə üzr istəyirəm, səhnəyə çıxıb meymunluq etməklə ciddi yumor sənəti yaratmaq olmaz. Bunun üçün kitab oxumaq lazımdır".
Sənətşünasın sözlərinə görə, telekanallardan bayağı verilişlər yığışdırılmalıdır: "Efirdə əhalinin zövqünü oxşayan hər bir proqram yayımlanmalıdır. Həm siyasi, həm sosial, həm mədəni, həm də insanları güldürən yumoristik verilişlər olmalıdır. Lakin o verilişlər elə peşəkar şəkildə tərtib olunmalıdır ki, tamaşaçı o proqramlara baxarkən həm dünyagörüşü artsın, həm də elmi baxımdan nəsə öyrənsin".
