On il əvvəl Nəqliyyatın İntellektual İdarəetmə Mərkəzi yaradıldı. Daha sonra həmin mərkəzin nəzarəti çərçivəsində dayanacaqlarda və avtobuslarda xüsusi monitorlar quraşdırılmasına qərar verildi. Bu məqsədlə dövlət büdcəsindən 100 milyon manat vəsait ayrıldı.
O qurğuların texniki baxımdan saxlanmasına da hər il büdcədən böyük vəsait sərf edilir. Həmin monitorlar avtobusun gəlmə vaxtını müəyyən etməlidir. Ancaq Bakıda əksər dayanacaqda monitorlar ya işləmir, ya da intervalı düzgün göstərmir.
Bu gün əksər dayanacaqda avtobusların gəlmə intervalını göstərən monitorlar, faktiki olaraq, işləmir. Nədənsə, onlardan heç bir məlumat almaq mümkün deyil. Sərnişinlərin işini asanlaşdırmaq məqsədilə, yəni avtobusların neçə dəqiqədən bir dayanacağa gələcəyini öyrənmək üçün quraşdırılan bu monitorların işləməsi, təəssüflər olsun ki, qısamüddətli oldu. Monitorlar işləmirsə, onların quraşdırılmasına nə ehtiyac var idi? Yeri gəlmişkən onu da qeyd edək ki, Çexiya kimi Avropa İttifaqının üzvü olan ölkədə dayanacaqlarda avtobus və digər ictimai nəqliyyatın gəlmə vaxtı kağız lövhələrdə göstərilir. Bu cür bahalı monitorlar quraşdırılmır. Ancaq Bakıda isə dövlətin vəsaiti hesabına quraşdırılan monitorların əksəriyyəti işləmir və demək olar ki, faydasızdır.
“Bu işdə günahkar olan şəxslər qanun qarşısında cavab verməlidirlər”
Məsələyə münaibət bildirən iqtisadiyyat üzrə fəlsəfə doktoru Firdovsi Şahbazovun sözlərinə görə, bütün bunlar sabiq nəqliyyat naziri Ziya Məmmədovdan miras qalıb: “Məhz onun nazirliyə rəhbərlik etdiyi dövrdə sözügedən monitorlar quraşdırıldı. İlk vaxtlar monitorlar işləyirdi. Həmçinin, bu və ya digər dərəcədə ictimai nəqliyyatın hərəkətini tənzimləyirdi. Ancaq bir müddət sonra həmin monitorlar, sadəcə, görüntü xatirinə saxlandı. Sözügedən monitorlar, bir növ, dayanacaqdan asılmış dəmir parçasıdır. Dayanacaqların çoxunda monitorlar işləmir. İşləyən monitorlar da vaxtı düzgün göstərmir. Ona görə də sərnişinlərin çoxu monitorlara heç baxmırlar. Problemin digər tərəfi ondan ibarətdir ki, Bakı şəhərində günün müxtəlif saatlarında tıxaclar olur. Tıxac olduğu üçün də avtobusların intervala uyğun hərəkət etməsi alınmır. Dünyada, adətən, bu cür monitorlar tıxac olmayan və yaxud da az tıxac olan yollarda quraşdırılır. Bakıda ilbəil tıxaclar dözülməz dərəcədə artır. Nəticədə monitorlarla bağlı ayrılan vəsait, bir növ, göyə sovruldu. Hesab edirəm ki, bu işdə günahkar olan şəxslər qanun qarşısında cavab verməlidirlər. Monitorlar işə yaramırsa, onların saxlanması əlavə xərcdir. Çünki həmin qurğulara texniki servis göstərilir. Bunun üçün hər il büdcədən vəsait ayrılır. Ona görə də dövləti əlavə xərclərdən xilas etmək üçün sözügedən monitorlar dayanacaqlardan çıxarılmalıdır. Başqa və daha optimal variant tapılmalıdır”.
Ekspert onu da qeyd etdi ki, indiki şəraitdə monitorların dayanacaqlarda saxlanmasının heç bir mənası yoxdur.
Vidadi ORDAHALLI
