Azərbaycan dövlətinin apardığı siyasətin əsas məqsədi ölkənin iqtisadi cəhətdən daha da inkişaf etməsidir. Çünki məhz iqtisadi yüksəliş dövlətə sosial məsələləri uğurla həll etməyə imkan verir.
Məlumdur ki, hər il ölkənin büdcəsi təsdiq olunarkən əhalinin sosial rifahının artırılması diqqət mərkəzində olur. Büdcədən sosial sahəyə ayrılan vəsaitin həcmi ildən-ilə artır. Hətta pandemiya şəraiti səbəbindən dövlətin gəlirləri müəyyən qədər azalsa belə, cari ildə də sosial sahəyə ayrılan vəsaitin həcmi çoxalıb. Həyata keçirilən sosial siyasət həm də geniş əhatəli olur. Bu zaman ölkənin sosial dəstəyə ehtiyacı olanların hamısının mənafeyi nəzərə alınır. Qeyd edək ki, həyata keçirilən bu siyasət beynəlxalq qurumlar tərəfindən də dəstəklənir. Həmin təşkilatlar ölkəmizdə bir sıra sosial layihələrin icrasını yüksək dəyərləndirir.
Məlumdur ki, şəhid və qazi ailələrinə dəstək olmaq üçün onlar özünüməşğulluq proqramına cəlb olunublar. Özünüməşğulluq proqramı Sığorta Fondu ilə yanaşı, BMT İnkişaf Proqramının, yerli bankların, Heydər Əliyev Fondunun dəstəyilə icra edilir.
Məlumat üçün qeyd edək ki, postmüharibə dövründə 1700-dən çox şəhid ailəsi üzvü və qazi özünüməşğulluq proqramına cəlb olunub. Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsinin yaydığı məlumatda qeyd olunur ki, müharibədən sonrakı dövrdə həmin kateqoriyalardan olan 1700-dən çox şəxs növbədənkənar olmaqla özünüməşğulluq proqramına cəlb olunub. Onlardan 900-ü şəhid ailələrinin üzvüdür. Proqrama cəlb olunanların istəkləri və əmək bacarıqları nəzərə alınaraq, seçdikləri iqtisadi fəaliyyət növləri üzrə kiçik təsərrüfat və müəssisələrini qurmaları üçün qısa müddətdə aktivlərlə təmin olunurlar.
Eyni zamanda, şəhid ailəsi üzvləri və qazilərdən ibarət 300 şəxsin məşğulluq məsələləri operativ şəkildə həll olunub. Onlar ödənişli ictimai işlər və əməkhaqlarının bir hissəsinin birgə maliyyələşdirilməsi proqramları çərçivəsində işlə təmin ediliblər.
“Yeni iş yerlərinin açılması, özünüməşğulluğun artırılması, qeyri-neft sektorunda irəliləyişlər uğurlu inkişafın bariz nümunəsidir”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, hər il xalqımızın sosial rifahı daha da yaxşılaşır. Yeni iş yerlərinin açılması, özünüməşğulluğun artırılması, qeyri-neft sektorunda irəliləyişlər uğurlu inkişafın bariz nümunəsidir: “44 günlük müharibə dövründə Vətən yolunda şəhid olan və ya yaralanan qazilərə dövlət tərəfindən yüksək qayğı və diqqət göstərilir. Onların sosial problemləri həll olunur, bank kreditləri verilir və bəzi şəhid ailələri özünüməşğulluq proqramına cəlb olunurlar. Artıq bu istiqamətdə lazımi işlər görülür. Çoxlu sayda ailə qeyd olunan proqrama qoşularaq həm özləri, həm də dövlət üçün müəyyən işlər görür. Ümumiyyətlə, hökumətin əsas missiyası bu qəbildən olan insanlara dəstək olmaqdır”.
Günel CƏLİLOVA
