Son zamanlar Bakıda su filtri satışı ilə məşğul olan firmalar fəallaşıblar. Qapı-qapı gəzərək sakinləri içdikləri suyun yararsız olmasına inandıran belə şirkət nümayəndələri filtri satmayana qədər əl çəkmirlər.
Onlar daha çox axşam saatlarında, bütün ailə üzvlərinin evdə olduğu vaxtda mənzillərin qapısını döyürlər. Əvvəlcə işi mənzilə yol tapıb ev sahibini suyun analizi üçün təcrübəyə razı salmaqdan ibarət olan xanım əməkdaş göndərilir. Daha sonra bir neçə qurğu ilə ailənin istifadə etdiyi suyun heç texniki suya da yaramadığını "sübut edir" və sağlam yaşamağın yeganə yolunun su filtri almaq olduğuna inandırırlar.
Qeyd edək ki, su filtrlərinin satışı ilə məşğul olan şirkət əməkdaşlarının keçirdikləri eksperimentlər əhalinin narazılığını bir qədər də artırır. Maraqlıdır, mənzillərə verilən içməli suyun tərkibi həqiqətən, qeyd edildiyi kimi, təhlükəlidir? Su filtrlərindən istifadə nə dərəcədə vacibdir?
Telman Zeynalov: “...suyun tərkibində karbonat çöküntüləri çoxluq təşkil edir”
Ekoloq Telman Zeynalov bildirdi ki, Bakıya gələn suların böyük əksəriyyəti Şollar və Oğuz-Qəbələ - Böyük Qafqazın sularıdır: “Məlumat üçün bildirim ki, Böyük Qafqaz əsasən karbonatlı süxurlardan ibarət olduğu üçün suyun tərkibində karbonat çöküntüləri çoxluq təşkil edir. Ümumilikdə, bunun miqdarı Qafqazın artezianlarından gələn sularda 45-46 milliqram litrdir. Bizə gələn suyu təmizləyən qurğular sayəsində bu göstəricini 16-17% endirmək mümkün olub”.
Həmsöhbətimiz onu da əlavə etdi ki, Kürün suyunda da bir problem var. Ora uzun müddət Azərbaycanın kənd təsərrüfatı zonasıdır. Buna görə də suyun tərkibində fosforlu birləşmələr belə var: “Nəzərə almaq lazımdır ki, Bakı böyük şəhər olduğu üçün onu içməli su ilə təmin etmək elə də asan məsələ deyil. Biz suyu normal işlədə bilmirik”.
Anar Cəbrayıllı: “...əhaliyə verilən su içməli su standartlarına tam uyğundur”
“Azərsu” Açıq Səhmdar Cəmiyyətinin(ASC) sözçüsü Anar Cəbrayıllı bildirdi ki, bu gün Azərbaycanda əhaliyə verilən su içməli su standartlarına tam uyğundur və bu, daimi nəzarətdədir: “Suyun tərkibinin dəyişməsinin səbəbi binadaxili kommunikasiya xətlərinin köhnə olması, bina damlarında çənlərdən istifadə edilməsidir ki, suyun keyfiyyətinə müəyyən təsir edir. Keyfiyyət standartlarına görə, su anbarları və çənləri ildə ən azı bir dəfə yuyulmalıdır”.
Günel CƏLİLOVA
