“...Gələcək vəzifələrə gəldikdə, əlbəttə ki, bu müsbət dinamika saxlanmalıdır. Eyni zamanda, heç kimə sirr deyil ki, dünyada texnologiyalar çox sürətlə inkişaf edir və biz addımlarımızı bu inkişafa uyğun şəkildə atmalıyıq. Əlbəttə, Azərbaycanda texnologiyaların inkişafı sahəsində daha böyük addımlar atılmalıdır.
Xüsusilə gəncləri bu işlərə biz daha geniş miqyasda cəlb etməliyik. Mən istedadlı gənclərlə görüşlər əsnasında bir şeyi gördüm ki, onların bəziləri öz biliklərini, innovasiyaları həyata keçirmək üçün xaricə üz tuturlar. Misal üçün, startaplarla bağlı bizim siyasətimiz əlbəttə ki, müsbətdir. Ancaq bu istedadlı gənclərlə görüşlər əsnasında aydın oldu ki, onların bir çoxları xaricdə fəaliyyət göstərirlər və Azərbaycana gəlirlər, gedirlər. Biz elə bir şərait yaratmalıyıq ki, istedadlı gənclərimiz Azərbaycanda fəaliyyət göstərsinlər, öz biliklərini burada tam realizə edə bilsinlər və ölkə iqtisadiyyatına, ölkəmizin güclənməsinə xidmət etsinlər. Ona görə yeni texnologiyaların Azərbaycanda tətbiqi prioritet məsələlərdən biridir. Burada, ilk növbədə, əlbəttə ki, dünyada artıq üzə çıxan ən müasir texnologiyaların Azərbaycanda tətbiqindən söhbət gedir. Bunu biz mütləq etməliyik. Ən müasir texnologiyalar Azərbaycanda bütün sahələrdə tətbiq edilməlidir. Eyni zamanda, istedadlı insanların fəaliyyəti daha düzgün təşkil edilməlidir ki, Azərbaycan texnologiyaların istehsalçısı kimi də öz rolunu oynasın və öz sözünü desin...”.
Bu fikirləri Prezident İlham Əliyev yanvarın 26-da Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən səsləndirib.
Prezident İlham Əliyev haqlı olaraq vurğulayıb ki, istedadlı gənclər ölkəyə gəlir və gedirlər, çünki texnologiyaların inkişafına lazımi əhəmiyyət verilmir.
“Aidiyyəti qurumlar aydınlıq gətirməlidirlər ki, nə üçün gənclərimiz ölkədən gedirlər, onlar xaricdə qurduqları bu şirkətləri Azərbaycanda qeydiyyatdan keçirmirlər...”
“Multimedia” İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz “Bakı-Xəbər”ə şərhində bildirdi ki, ölkə başçısı olduqca vacib bir məsələni və onun həllini gündəmə gətirib. “Prezidentin fikirləri tamamilə həqiqəti və reallığı əks etdirir. Yaxşı haldır ki, bu məsələ ilə bağlı vəziyyət artıq vurğulanır. Yəni Prezident səviyyəsində bunun deyilməsi, qeyd edilməsi o deməkdir ki, bu sahəyə diqqət artırılacaq, problemlər həll olunacaq. Real vəziyyət doğrudan da ondan ibarətdir ki, bizim regional, qlobal miqyasda öndə olan, irəliləyən, oturuşan startaplarımız kənarda - Türkiyədə, Avropada və sair ölkələrdə yaradılıb. Yəni onu işlədənlər azərbaycanlılardır, amma onlar startapları aparıb Dubayda, Avropada və digər ölkələrdə qeydiyyatdan keçiriblər və orada oturuşublar, onların Azərbaycanla da müəyyən əlaqələri var. Amma, istənilən halda, startaplar, onların maliyyə dövriyyələri, gəlirləri, çıxarları, bank əməliyyatları və sair xarici ölkələrdə baş verir. Yəni sanki, belə demək mümkündürsə, fayda daha çox o ölkələrə olur. Ona görə də Prezident tərəfindən bu məsələnin səsləndirilməsi çox ümdə məsələdir, bu bir həyəcan təbilidir. Mənə elə gəlir ki, bunu həyəcan təbili saymaq olar. Aidiyyəti qurumlar aydınlıq gətirməlidirlər ki, nə üçün bizim gənclərimiz ölkədən gedirlər, onlar xaricdə qurduqları bu şirkətləri Azərbaycanda qeydiyyatdan keçirmirlər, niyə o şirkətlər, bu infrastruktur burada qurulmur? Bunun dərin kökləri, səbəbləri araşdırılmalıdır. Bu problem bizə məlumdur. Burada qanunvericiliklə, risqlərin sığortalanması ilə bağlı problemlər var. Mən dekabrın sonunda “Facebook”dakı hesabımda startap mühit üçün faydalı ola biləcək qanunların siyahsını yazmışam. Təxminən 15-ə qədər sənədin adını qeyd etmişəm. Bizdə vençur maliyyələşmə ilə bağlı qanunvericilik yoxdur. Elektron ticarətlə bağlı qanun 20 il bundan əvvəl qəbul edilib. Ödəniş xidmətləri, ödəniş sistemləri haqqında qanun yoxdur. Yəni belə problemlər var, gərək o problemlər aradan qaldırılsın ki, burada startap, innfovasi üçün şərait münbitləşsin. Hazırda bu şəraitlə bağlı müəyyən problemlər var. Yəni onu qaydaya salmaq lazımdır. Prezident də buna işarə vurdu. Ümid edirəm ki, aidiyyəti dövlət qurumları buna diqqət yetirəcəklər”.
O.Gündüz bildirdi ki, Prezident bu sahədə olan gənclərin ölkəmizə gəlib, sonra yenidən xarici ölkələrə getdiyi ilə bağlı məsələni xüsusi vurğulamaqla kadrlara şərait yaradılması məsələsini önə çəkib. “Prezidentin nitqində kadrlarla bağlı məsələyə də önəm verildi. Dördüncü sənaye inqilabı ilə bağlı müəyyən çağırışlar var. Bundan dolayı yaxın perspektivdə bəzi ixtisaslar yoxa çıxacaq. Deyək ki, yeni ixtisaslar formalaşacaq və bizim təhsil sistemi buna cavab verməlidir. Yəni buna adaptasiya olunmalıdır. Əmək bazarı gələcəkdə bunu tələb edəcək. Hesab edirəm ki, burada rəqəmsallaşma, innovasiyalar, o cümlədən, dördüncü sənaye inqilabının çağırışları baxımından Prezidentin çıxışında xeyli çağırış, xeyli həyəcan təbili vardı. Fikrimcə, Prezidentin vurğuladığı məsələlərdən gərək aidiyyəti dövlət qurumları nəticə çıxarsınlar” - deyə O.Gündüz qeyd etdi.
İradə SARIYEVA
