Mənzil hədiyyəsi hər iki Qarabağ müharibəsinin əlil və şəhid ailələrinə aid edildi – dövlətin növbəti sosial dəstək layihəsi...

Fatimə Hacıbəyli: “Azərbaycanda müharibə əlillərinə və şəhid ailələrinə böyük diqqət var”

img

Azərbaycan Respublikasının müstəqilliyi uğrunda canını fəda etmiş şəhidlərimizin ailələrinə diqqət və qayğı ölkəmizdə yüksək səviyyədədir.

Ali Baş Komandan İlham Əliyevin və Birinci vitse-prezident Mehriban Əliyevanın müvafiq göstərişlərinə əsasən, dövlət qurumları bu kateqoriyadan olan insanların problemləri ilə yaxından maraqlanır, onların problemlərinin aradan qaldırılması üçün mütəmadi olaraq tədbirlər həyata keçirilir. Birinci və İkinci Qarabağ müharibəsində şəhid olmuş qəhrəmanlarımızın ailə üzvlərinə və müharibə iştirakçılarına qayğı və diqqət nəinki dövlət qurumlarının, həm də cəmiyyətin böyük bir hissəsinin mühüm bir vətəndaşlıq borcuna və vəzifəsinə çevrilib. Bu isə cəmiyyətdə birliyin və qarşılıqlı etimadın yeni təzahür forması kimi bütün təbəqələrdən olan insanlar tərəfindən xoş ovqatla qarşılanır, onların dövlətimizə və qalib Prezidentimizə inam hisslərini və məhəbbətini gündən-günə artırır.

Qeyd etdiyimiz kimi, Birinci və İkinci Qarabağ müharibəsi iştirakçılarına dövlət tərəfindən xüsusi qayğı, diqqət göstərilir. Onların sosial problemlərinin həll olunması istiqamətində lazımi işlər görülür.

Görülən işlərdən biri də hər iki Qarabağ müharibəsi şəhidlərinin ailələri və əlillərin mənzil təminatının paralel aparılmasıdır. 2014-cü il yanvarın 1-dən 2020-ci il yanvarın 1-dək növbəyə alınmış şəxslər, eyni zamanda, 2020-ci ildəki hərbi əməliyyatlar nəticəsində mənzil almaq hüququ qazanan şəhid ailələri və müharibə əlillərinin mənzil təminatı paralel həyata keçiriləcək. Əmək və Əhalinin Sosial Müdafiəsi Nazirliyinin Sosial təminat siyasəti şöbəsinin müdiri Babək Hüseynov media nümayəndələrinə açıqlamasında qeyd edib ki, 2014-cü il yanvarın 1-dən 2020-ci il yanvarın 1-dək növbəyə alınmış şəxslərin siyahısı artıq yerli icra hakimiyyətlərində var. Bu siyahı onlar tərəfindən ƏƏSMN-ə təqdim ediləcək: “2020-ci ildə zəfərlə bitən müharibədə şəhid olanların ailələrini və əlillərini uzun müddət mənzil növbəsində gözlətməmək üçün hər iki kontingentlə bağlı məsələlər növbəlilik əsasında aparılacaq. Bu səbəbdən 5 il ərzində bu sərəncamın icrası ilə bağlı yekunlaşdırma tapşırığı verilib. Artıq Bakıda və digər şəhərlərdə keçmiş məcburi köçkünlər üçün tikilən və hazır vəziyyətə gətirilən yaşayış evləri ƏƏSMN-nin balansına veriləcək. Nazirlik tərəfindən həmin mənzillərin növbəlilik əsasında şəhid ailələri və müharibə əlillərinə verilməsi nəzərdə tutulur”.

Hər iki Qarabağ müharibəsi iştirakçılarının mənzil təminatının yaxşılaşdırılması istiqamətində görülən işlər ölkə ictimaiyyəti tərəfindən yüksək qiymətləndirilir.

  • “Hər iki Qarabağ müharibəsi iştirakçılarının dövlət tərəfindən evlərlə və mənzillərlə təmin edilməsi təqdirəlayiq haldır”

“Vəfa” Sosial-İctimai Birliyinin sədri Fatimə Hacıbəyli qeyd etdi ki, Azərbaycan dövlətinin ölkəmizin ərazi bütövlüyü uğrunda həlak olan, yaralanan, zərər çəkən insanların sosial müdafiəsi istiqamətində bütün resurslarından istifadə etməsi hər il artan xətt üzrə inkişaf edir. Bu da ölkə Prezidentinin Azərbaycan vətəndaşına verdiyi dəyərin daha bir göstəricisidir: “Hər iki Qarabağ müharibəsi iştirakçılarının dövlət tərəfindən evlərlə və mənzillərlə təmin edilməsi təqdirəlayiq haldır. Hətta bir çox mənzilin açarlarını şəhid ailələrinə Prezident İlham Əliyevin şəxsən təqdim etməsi də ictimaiyyət tərəfindən böyük rəğbətlə qarşılanır, xalq tərəfindən yüksək dəyərləndirilir”.

Həmsöhbətimiz onu da əlavə etdi ki, Azərbaycanda müharibə əlillərinə və şəhid ailələrinə böyük diqqət var. Onlara müavinətlər təyin olunub, mənzil şəraitləri yaxşılaşdırılıb: “Eyni zamanda, sağlamlıqlarının bərpa olunması üçün Heydər Əliyev Fondu tərəfindən mütəmadi olaraq dəstək verilir. Bundan başqa, Qarabağ əlilləri avtomobillə təmin edilir, işlə bağlı məsələlərdə onlara xüsusi güzəştlər var və s. Amma hesab edirəm ki, onlar üçün nə etsək, yenə də azdır. Çünki bu insanlar heç nəyi düşünmədən Vətən yolunda canlarını fəda ediblər. Düşünürəm ki, biz hamımız onlara borcluyuq. Bu insanlara yalnız dövlət səviyyəsində deyil, cəmiyyət olaraq dəstək olmalıyıq. Təbii ki, həmişə olduğu kimi, bundan sonra da dövlət həm Qarabağ müharibəsi əlillərinin, həm də şəhid ailələrinin yanında olacaq”.

Günel CƏLİLOVA

Son xəbərlər