“Heydər Əliyev Beynəlxalq Hava Limanı beşulduzlu hava limanıdır və dünyada belə hava limanlarının sayı 10-a yaxındır. MDB-də isə artıq neçə ildir ki, birinci yerdədir”. Bunu Prezident İlham Əliyev Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən çıxışı zamanı deyib.
Dövlət başçısının sözlərinə görə, bu gün bizim təyyarə parkı ən müasir parklardan biridir: “Həm yük təyyarələrimiz, həm sərnişin təyyarələrimiz müasirdir, dünyanın aparıcı şirkətlərinin istehsalıdır. Bakıdakı Heydər Əliyev Beynəlxalq Hava Limanı beşulduzlu hava limanıdır və dünyada belə hava limanlarının sayı 10-a yaxındır. MDB-də isə artıq neçə ildir ki, Heydər Əliyev Beynəlxalq Hava Limanı birinci yerdədir. Mənim göstərişimlə digər şəhərlərimizdə inşa edilmiş hava limanları bizim nəqliyyat potensialımızı böyük dərəcədə gücləndirir. Son illərdə 7 hava limanı inşa edilmişdir. Onlardan 6-sı beynəlxalq statusa malikdir və bütün növ təyyarələri, o cümlədən, ən ağır yük təyyarələrini qəbul edə bilir. Bildiyiniz kimi, Füzuli şəhərində yeni beynəlxalq hava limanının inşasına start verilib və azad edilmiş torpaqlarda - ya Laçın, ya Kəlbəcər rayonlarının ərazisində ikinci beynəlxalq hava limanı inşa ediləcək”.
Belə məlum olur ki, dünyada beşulduzlu hava limanlarının sayı olduqca azdır. Ancaq Azərbaycan bu cür üstünlüyə malik olan hava limanına sahibdir. Maraqlıdır, beşulduzlu hava limanı hansı xüsusiyyətlərə malik olur? Bunun digər hava limanlarından fərqi nədir?
“Bu cür brendə sahib olmaq ölkəyə daha çox turistin cəlb edilməsi, beynəlxalq tədbirlərə evsahibliyi etmək deməkdir”
Sözügedən məsələyə aydınlıq gətirən sabiq maliyyə naziri, professor Fikrət Yusifovun sözlərinə görə, beşulduzlu hava limanı bir sıra parametrlərə malik olur: “Burada söhbət bütün standartlara cavab verən hava limanından gedir. İnsanların bir məkandan başqa məkana uçması üçün bütün imkanları özündə birləşdirən hava limanı beşulduzlu adlanır. Məsələn, beşulduzlu oteldə insanlara xidmətlə bağlı hər bir şey olur. Beşulduzlu hava limanı da belədir. Sərnişin üçün lazım olan bütün vasitələr, xidmət növləri belə hava limanlarında olur. Belə hava limanları digər beynəlxalq hava limanları kimi olmur. Beşulduzlu hava limanlarında sərnişinlərə lazım olan bütün xidmət növləri yüksək səviyyədə olur. Beynəlxalq hava limanlarında göstərilən bütün xidmətlər sərnişinlərə yüksək səviyyədə təqdim edilir. Məhz bu xüsusiyyət bu cür hava limanlarını digərlərindən fərqləndirir. Özü də bu qiymətləndirməni hansısa ölkələr yox, müvafiq beynəlxalq qurumlar həyata keçirir. Yəni onlar gəlib baxır, qiymətləndirmə aparır və sonra da bunu bəyan edirlər. Heydər Əliyev Beynəlxalq Hava Limanının bu cür azsaylı hava limanlarından biri olması çox yaxşı haldır. Ona görə ki, bu, Azərbaycanın imicidir. Çünki hava limanı ölkəyə açılan qapıdır. Bu cür brendə sahib olmaq ölkəyə daha çox turistin cəlb edilməsi, beynəlxalq tədbirlərə evsahibliyi etmək deməkdir”.
Professor onu da qeyd etdi ki, bu cür üstünlüklərə sahib olmaq ölkəmizin inkişafına töhfə verir.
Vidadi ORDAHALLI
