Redaksiyamıza bir sıra siyasi partiya sədrləri, millət vəkilləri, elm adamları və jurnalistlər tərəfindən “COVID-19” xəstəliyi ilə mübarizə aparan və hazırda Fövqəladə Hallar Nazirliyinin modul tipli xəstəxanasında müalicə alan I Qarabağ müharibəsinin qazisi, pedaqoq, tarix elmləri üzrə fəlsəfə doktoru Dilavər Əzimlinin vəziyyətini nəzarətə götürməsi üçün Azərbaycan Respublikasının Prezidenti İlham Əliyevə müraciət daxil olub.
Mürciətdə bildirilir:
“Hörmətli cənab Prezident!
Pandemiya şəraitində insanlarımızın sağlıq durumu və səhhəti ilə bağlı çox ciddi problemlər yaşanır. Bilirik ki, bu xəstəlik bütün dünyanı bürüyüb, Azərbaycandan da yan keçməyib və təəssüf ki, bir çox insanımız bu amansız xəstəlikdən dünyadan köçür.
Hörmətli cənab Prezident!
Azərbaycan Respublikasının müstəqillik qazanması uğrunda Xalq Hərəkatının fəallarından olan, Azərbaycanın milli ruhunu və milli tarixini araşdıran, elmimizin inkişafında hər zaman ön sıralarda dayanan, I Qarabağ müharibəsinin qazisi, pedaqoq, tarix elmləri üzrə fəlsəfə doktoru Dilavər Əzimli də dünyanın bəlasına çevrilən “COVID-19” xəstəliyi ilə mübarizə aparır. Hal-hazırda o, Fövqəladə Hallar Nazirliyinin modul tipli xəstəxanasında müalicə alır. Çox təəssüf hissi ilə qeyd edirik ki, vəziyyəti kəskin ağırlaşan Dilavər Əzimli artıq 04.01.2021-ci il tarixindən süni nəfəs aparatına qoşulub.
Bu gün dövlətini, millətini sevən, minlərlə tələbənin sevimli müəllimi olan, hər zaman Azərbaycan ideologiyası ilə yaşayıb-yaradan ziyalımız Dilavər Mirzəkişi oğlu Əzimlinin həyatı üçün böyük təhlükə var və bu cür alimimizin itirilməsi Azərbaycanın tarixi, tarixinin araşdırılması üçün də ciddi problem yarada bilər.
Möhtərəm cənab Prezident!
Xahiş edirik, Azərbaycanın tarixçi alimi Dilavər Əzimlinin səhhətinin normala qayıtması və "COVID 19" xəstəliyindən müalicə olunması üçün səlahiyyətli dövlət qurumlarına müvafiq göstəriş verəsiniz”.
Qeyd edək ki, müraciəti Ümid Partiyasının sədri İqbal Ağazadə, Vətəndaş Həmrəyliyi Partiyasının sədri, millət vəkili Sabir Rüstəmxanlı, Xalq Partiyasının sədri Pənah Hüseyn, Azərbaycan Demokrat Partiyasının sədri Sərdar Cəlaloğlu, Böyük Quruluş Partiyasının sədri, millət vəkili Fazil Mustafa, Bütöv Azərbaycan Ocaqlarının başqanı Zahir Əlisoy, Bütöv Azərbaycan Ocaqları Mərkəzi Şurasının sədri Paşa Həsənli, Millətçi Demokrat Partiyasının sədri Qələndər Muxtarlı, jurnalist Zaur Qəriboğlu, “Konstitusiya” Araşdırmalar Mərkəzinin sədri Əliməmməd Nuriyev, Ağ Partiyanın sədri
Tural Abbaslı, jurnalist Əvəz Zeynallı, Ərciyəz Universitetinin professoru Qafar Çaxmaxlı, Demoratik Dəyişim Platformasının sədri Əli Mustafa, Aydınlar Partiyasının sədri Qulamhüseyn Əlibəyli, Aydınlar Partiyası sədrinin müavini Qorxmaz İbrahimli və Azərbaycan Milli Elmlər Akademiyasının Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli, politoloq Azər Rəşidoğlu, tarix üzrə fəlsəfə doktoru, dosent, BAO başqanının siyasi məsələlər üzrə müavini Alı Balayev, pedoqogika üzrə fəlsəfə doktoru Eldəniz Abbaslı, AMEA-nın Tarix İnstitutunin əməkdaşı, tarix üzrə fəlsəfə doktoru, dosent Münariz Ağalarlı, AMEA-nın Tarix İnstitutunun böyük elmi işçisi Bəxtiyar Həsənov və AMEA-nın Tarix İnstitutunun böyük elmi işçisi Məmməd Cəbrayılov, AMEA-nın Tarix İnstitutunun aparıcı elmi işçisi Şahlar Şərifov, AMEA-nın Tarix İnstitutunun böyük elmi işçisi Araz İftixari, Əməkdar jurnalist Ləman Ələşrəfqızı, Milli Cəbhə Partiyasının sədrinin müavini, politoloq Məhəmməd Əsədullazadə, jurnalist, Azərbaycan Yazıçılar Birliyinin üzvü Əziz Mustafa, filologiya elmləri doktoru, dosent Məhsəti İsmayıl, Hüquqi, İqtisadi və Sosial Tədqiqatlar Mərkəzinin direktoru Əli Hacı Ağaevli imzalayıb.
Baki-xeber.com
