Yaxın günlərdə peyvəndi gözləyirik və ondan sonra normal həyat bərpa ediləcək. Bunu Prezident İlham Əliyev yanvarın 5-də Anar Kərimovu mədəniyyət naziri təyin olunması ilə əlaqədar videoformatda qəbul edərkən çıxışı zamanı deyib. Dövlət başçısı bildirib: "Ümid edirəm ki, bu il peyvənd tətbiq olunandan sonra pandemiya artıq yavaş-yavaş yoxa çıxacaq. Biz də yaxın günlərdə peyvəndi gözləyirik və ondan sonra normal həyat bərpa ediləcək. Bizim mədəni həyatımız çox zəngin olmalıdır, müsabiqələr, festivallar keçirilməlidir. Biz həm Azərbaycan mədəniyyətini dünyada təbliğ etməliyik, həm də xarici qonaqları bundan sonra da dəvət etməliyik".
Göründüyü kimi, Azərbaycan Prezidenti pandemiyanın fəasdlarının aradan qaldırılacağı ilə bağlı çox inamlı danışıb və bunu əsasən peyvəndlərin olcağı ilə əsaslandırıb. Ölkədə həyata keçirilməsi nəzərdə tutulan kütləvi peyvəndləmə bu sahədə hansı dönüşü etmək gücündədir?
“Peyvəndləmədən sonra yalnız Azərbaycanda deyil, bütün dünyada vəziyyətdən yaxşıya doğru dəyişəcəyinə ümid edə bilərik”
Sağlamlığa Xidmət İctimai Birliyinin icraçı direktoru Pərvanə Vəliyeva qəzetimizə bildirdi ki, dünya alimlərinin son proqnozlarına görə, 2021-ci ilin sonlarına kimi dünya əhalisinin təxminən 75 faizinin peyvədlənməsi gözlənilir: “Deməli, bu prosesin tam aradan qaldırılması ilə bağlı yeganə ümidlər vaksinlərədi. Bilirsiniz ki, dünyanın müxtəlif ölkələrində bu proses həyata keçirilir. Vaksin üçün müraciət edən 190 ölkənin 180-na vaksinlərin veriləcəyi təsdiqlənib. Bir çox ölkərədə bu prosesin həyata keçirilməsi gözlənilir. Bununla bağlı ölkələr üzərlərinə ciddi öhdəliklər götürməli olurlar. Çünki həmin vaksinlərin gətirilməsi, saxlanılması belə ciddi maliyyə tələb edir. Bunun üçün vaksinləri mənfi 50 dərəcə tempraturda saxlaya bilən soyuduculara ehtiyac var. Yəqin ki, Azərbaycan artıq bütün hazırlıqları görüb. Proses ilkin olaraq tibb işçiləri arasında aparılacaq. Sonra yaşı 65-dən yuxarı olan və COVİD-lə bağlı xüsusi risq qrupuna aid insanlara tətbiq ediləcək. Hələlik vaksinlərin insanaları nə qədər müddətə tam qoruyacağı da bilinmir. Ola bilər ki, digər xəstəlik əleyhinə olan peyvəndlər kimi onlar da mövsumi olsun. Nəzərdə tutulub ki, peyvəndlənmədən keçən hər bir vətəndaş üçün xüsusi COVİD pasportu veriləcək. Bunun da nəticəsində ölkəni tərk edən adamın testdən keçməsinə ehtiyac qalmayacaq. Sevindirici haldır ki, Azərbaycan ümidverici olan bu prosesə qoşulub. Ölkə rəhbərliyinin nikbinliyini bununla izah edə bilərik”.
Ekspertin sözlərinə görə, bu bir sıra addımları özündə cəmləyən prosedurdu: “Hər halda, peyvəndləmədən sonra yalnız Azərbaycanda deyil, bütün dünyada vəziyyətdən yaxşıya doğru dəyişəcəyinə ümid edə bilərik”.
Məhəmmədəli QƏRİBLİ
