Noyabrın 11-də Azərbaycan Respublikasının Prezidenti, Silahlı Qüvvələrin müzəffər Ali Baş Komandanı İlham Əliyev 1 saylı Kliniki Tibbi Mərkəzdə müalicə olunan hərbçilərlə görüşüb. Prezident yaralı hərbçilərlə görüşən zaman bir sıra məsələlərə toxunub.
O cümlədən, qeyd edib ki, işğaldan azad olunmuş ərazilərdə təhlükəsizlik, ondan sonra infrastruktur, bütün başqa bərpa məsələləri öz həllini tapacaq: “Bölgələrə qruplar göndərilir, vurulmuş ziyan hesablanır. Dağılmış bütün evlərin hamısı dövlət hesabına yenidən tikiləcək, zərər görmüş bütün evlər dövlət tərəfindən bərpa ediləcək. Vətəndaşlarımızın itirilmiş mülkiyyəti bərpa ediləcək, itirilmiş ev heyvanları vətəndaşlara veriləcək. Yəni bizim vətəndaşlarımız tam əmin ola bilərlər ki, onların itirilmiş bütün mülkiyyəti bərpa ediləcək”.
Prezident bildirib ki, həmin torpaqlarda kimin nə qədər mal-heyvanı məhv olubsa, onlar dövlət tərəfindən təmin olunacaq. Bu addım işğaldan azad olunmuş ərazilərin inkişafına necə təsir edəcək?
“…həmin insanların maddi vəziyyətinin yaxşılaşmasına səbəb olacaq”
İqtisadçı-ekspert Kamran Məmmədli qeyd etdi ki, işğaldan azad edilmiş ərazilərdə yaşayacaq insanlara tələf olunmuş mal-heyvanının əvəzinin verilməsi həmin insanların maddi vəziyyətinin yaxşılaşmasına səbəb olacaq: “Məlumdur ki, öz yurdlarından didərgin düşmüş insanlar mülkiyyətlərini də itiriblər. Onlara dəstək olmaq üçün dövlət tərəfindən yardımın edilməsi alqışlanmalıdır. Bu kimi addımlar Qarabağda aqrar sektorun inkişaf etməsinə səbəb olacaq. Qarabağda kənd təsərrüfatının inkişafı üçün geniş imkanlar var. Orada üzümçülük və şərabçılığın inkişafı üçün böyük perspektivlər var. Üzümçülük üç-dörd ildə qazanc gətirir, amma əvvəlcə buna çox investisiya qoymalısınız. Son hesablamalarımıza görə, bir hektar ting üçün 15 min avro xərclənir ki, bu da böyük məbləğdir. Üzümçülüklə yanaşı, Qarabağda tərəvəzçilik sahəsini də inkişaf etdirmək olar”.
Həmsöhbətimiz hesab edir ki, kənd təsərrüfatının dirçəlişi üçün logistikanın inkişafı və yolların bərpası lazımdır. Aqrar sahənin inkişafında fermer təsərrüfatlarının, kooperativlərin və aqroparkların, eləcə də kənd təsərrüfatı məhsullarının emalından son məhsul alınanadək bütün mərhələləri əhatə edən klasterlərin yaradılmasına üstünlük verilməsi daha məqsədəmüvafiqdir. Aqrar-sənaye kompleksi müəssisələri, fermer təsərrüfatları dövlətin maliyyə yardımı ilə təmin edilməli və kənd təsərrüfatında bazar prinsiplərinə əsaslanan sığorta sistemi təşkil olunmalıdır.
Günel CƏLİLOVA
