Azərbaycan Dövlət Neft və Sənaye Universiteti müharibədə döyüşən tələbələrin diplomunu vermir. Bu barədə Vətəndaşların Əmək Hüquqlarının Müdafiəsi Liqasının sədri Sahib Məmmədov öz "Facebook" hesabında məlumat paylaşıb.
Hüquq müdafiəçisi qeyd edib ki, o, adıçəkilən universitetdə ictimai şuranın üzvüdür: “Etiraf edim ki, universitetdə xeyli pozitiv dəyişiklik var. Amma bu yaxınlarda məni dəhşətə salan xəbərlər eşidirəm. Universitet rektoru hazırda hərbi xidmətdə və döyüşdə olan tələbələrin diplomlarını valideynlərinə vermir. Deyir ki, özləri gəlsin. Bəzi tələbələrin isə kiçik məbləğdə borcları var. Hədələyirlər ki, döyüşdə olmaqlarının dəxli yoxdur. Pulu ödəməlisən. Ödəyəndə də yenə diplom verilmir ki, özü gəlsin, ya da notariusdan etibarnamə versin. Hərbi xidmətdə, döyüşdə olan hərbçidən etibarnamə tələb edirlər. Qanunun formal tərəfini qoyuram bir tərəfə, amma bu rektor və onun komandasında elementar insani hisslərin olmaması təəssüf doğurur. O bayrağı yalandan asmaqla deyil. Çox təəssüf. Telefonla rektorun köməkçisi ilə danışmaq istədim. Adam elə danışdı ki, sankı yerin-göyün sahibidir. Elementar etikadan xəbəri yoxur adamın".
Azərbaycan Dövlət Neft və Sənaye Universiteti - Qasım Məmmədov: “Məlumat həqiqətə uyğun deyil, diplomlarını etibarnamə olmadan, hətta istənilən qohumu gəlib götürə bilər”
Məsələ ilə bağlı Azərbaycan Dövlət Neft və Sənaye Universiteti ilə əlaqə saxladıq. Universitetin Tədris işləri üzrə prorektoru, texnika elmləri namizədi, dosent Qasım Məmmədov bizimlə söhbətində qeyd etdi ki, məlumat həqiqətə uyğun deyil: “Mən bilmirəm ki, nəyə əsasən bunu iddia edir. İnsan əvvəlcə bir yoxlayar, dəqiqləşdirər, sonra yazar da... Biri gəlsin mənə söz desin, mən qulağıma inanmalıyam, ya gözümə? Sahib Məmmədov bizdə İctimai Etimad Şurasının üzvdür. Bu məlumatlar hamısı yalandır. Tələbələrin təhsil haqqı qalıbsa belə, onlar keçilir. Diplomlarını etibarnamə olmadan, hətta istənilən qohumu gəlib götürə bilər”.
Sahib Məmmədov: “Mən diplomunu ala bilməyən tələbələrdən birinin dayısıyam”
Məlum olayla bağlı Sahib Məmmədovla əlaqə saxladıq. O isə bildirdi ki, bir həftədir bu məsələ ilə bağlı rektorla danışıqlar aparır, SMS yazır və zəng edir: "Mən nə var, onu yazmışam. Burada yalandan söhbət gedə bilməz. Mən diplomunu ala bilməyən tələbələrdən birinin dayısıyam".
Günel CƏLİLOVA
