Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyilə “Türk Dünyası İnfo” İB tərəfindən həyata keçirilən “Azərbaycançılıq ideyalarının tədbliğinə dair yeni araşdırmalar və toplunun nəşri” adlı layihənin icrası yekunlaşıb.
“Türk Dünyası İnfo” İctimai Birliyindən bildiriblər ki, 4 ay müddətinə həyata keçirilən bu layihə Azərbaycan xalqının və ümumən dünya azərbaycanlılarının taleyində mühüm əhəmiyyət daşıyan azərbaycançılıq ideyalarının xalqımızın şüurunda möhkəm yer tutması, müstəqillik dövründə dövlət ideologiyasına çevrilməsi prosesinin araşdırılması, öyrənilməsi və nəticə etibarilə nəşr olunacaq kitab vasitəsi ilə təbliği məsələlərinə həsr olunub.
İctimai birlikdən bildirilib ki, layihənin əsas məqsədi bugünün və sabahın ən əsas dövlətçilik ideologiyalarından biri olan azərbaycançılığın əhatəsində olan milli-tarixi gələnəklərimizin, vətənpərvərlik tariximizin, dilimizin, milli-mənəvi irsimizin təbliğinə dəstək olmaq, soydaşlarımızın dünyada ictimai-siyasi fəallığını artırmaq yolunda potensial imkanları dəyərləndirmək, onların arasında daha sıx əlaqələr yaratmaq, milli birlik istiqamətində dövlətimizin apardığ ardıcıl və sistemli siyasətə ictimai sferada töhfə verməkdir.
İcra müddətində əsas məqsəddən çıxış edərək Azərbaycançılıq ideyasının formalaşması zərurətinin meydana çıxması, xalqımızın gələcəyində daim aktuallığı gözə alınaraq yeni araşdırmalar aparılıb sistemləşdirilib. QHT bu layihə ilə ölkəmizin müstəqilliyi dönəmində Azərbaycançılıq ideyasının dövlət ideologiyasına çevrilməsini şərtləndirən aktual amillərin təbliğata cəlb olunması, azərbaycançılıq meyllərinin gücləndirilməsi timsalında istedadlı gənclərin yaradıcılıq potensialını milli həmrəylik yönündə yeni təbliğat işində iştirak etməyə çalışıb.
Layihə çərçivəsində publisist-şair Dəyanət Osmanlının “Azərbaycançılıq. Gerçəyin dərsi” adlı bir kitab nəşr edilib. Müəllifin müxtəlif illərdə yazdığı azərbaycançılıq ideyalarına dair məqalələr, müsahibələr, açıqlamalarının toplandığı nəşrdə Azərbaycan xalqının formalaşmasında mühüm rolu olan azərbaycançılıq ideologiyaasının müxtəlif aspektləri, xalqın milli ruhunu, dilini, adət-ənənəsini, vətənpərvərlik duyğularını özündə ehtiva edən məsələlər araşdırmaya cəlb edilib. “Elm və təhsil” nəşriyyatının mətbəəsində nəfis şəkildə 360 tirajla çap olunmuş nəşrin məsləhətçisi akademik Nizami Cəfərov, redaktoru filologiya üzrə fəlsəfə doktoru İlahə Abdullayevadır.
Kitabın kitabxanalara, ziyalılara və gənclərin daha çox təmsil olunduğu müxtəlif auditoriyalara paylanılması işi yerinə yetirilir. Belə bir kitabın nəşri hər birimizin azərbaycanlı adına, mənəviyyatına layiq olması, vətənpərvərliyi, xalqımızın cəmiyyətdə əsrlərlə mövcud olan nümunəvi davranış ənənələrini qoruması, milli-mənəvi dəyərləri yaşatması və gələcəyə ötürməsi zərurətindən irəli gəlir.
Baki-xeber.com
