Ölkəmizdə müqəddəs Vətən müharibəsi gedir. 30 il həsrətində olduğumuz Qarabağ torpaqları qarış-qarış azad edilir. Ön cəbhədə Şanlı Ordumuz erməni dığalarının üzərində zəfər çaldığı kimi, arxada olan Azərbaycan xalqı öz igid vətən övladlarına dayaq durmaqla bərabər, hər an Ali Baş Komandan İlham Əliyevin əmri ilə dövlətimizin apardığı haqq savaşına atılmağa hazırdır.
Tacir Qədirzadə Astara rayonunun Şiyəkəran kəndində yaşayır. Bu 28 yaşlı hərbi əlil el-obada, eləcə də bütün rayonda böyük hörmət və nüfuz sahibidir. Bu da ondan irəli gəlir ki, qəlbi Vətən sevdalı Tacir vətənlə bir yerdə ağlamağı və gülməyi bacaran əsl vətəndaşdır. Hazırkı döyüş imkanları məhdud olsa da, vaxtında erməni dığalarından yaxşı qisas alıb. Astaranın bu igid oğlu dığalarla üz-üzə döyüşməsə də, əlindən gələn köməkliyini Ordumuza göstərir. Həm də hərbi-vətənpərvərlik mövzusunda igidliyi, mərdliyi vəsf edən şeirlər yazır, onlara mahnılar bəstələyir, elə vətənə ilahi sevgidən yaranan bu nəğmələrini də özü oxuyur.
Bu günlərdə isə T.Qədirzadə müqəddəs Vətən müharibəsində erməni dığalarına qan qusduran Şanlı Ordumuza daha yaxından həmrəyliyini bildirmək üçün özünə Azərbaycan bayrağından libas tikdirib. Pencək, jilet, papaq və qalstukdan ibarət olan bu geyim ona yaraşmaqla, baxanların da ürəyində vətənə sonsuz sevgi hissləri yaradır. Tacir bu libasla ilk dəfə Bakıda Şəhidlər Xiyabanını ziyarət edib. O deyir:-“Məni bu libası tikdirməyə vadar edən Vətənə, dövlətimizə, bayrağımıza olan məhəbbət və sədaqət hissi, Milli Ordumuza mənəvi dəstək olmaqdır. Bu, həm də rəmzi məna daşıyır. Bu günlər ölkəmizin hər yerində, o cümlədən müharibə bölgəsində, düşmən tapdağından azad edilmiş yaşayış məntəqələrində Azərbaycan bayrağı dalğalanır. Mən bundan qürur duyuram. Bayrağımız bizim qürurumuz, başımızın tacıdır. Ölkəmiz üçün bu çətin, həm də şərəfli günlərdə hamımız Prezidentimiz, Ali Baş Komandan İlham Əliyevin yanındayıq. O, Qarabağ torpağının azad olunması üçün hər şeyi edir. Milli Ordumuzda böyük ruh yüksəkliyi var. İnanıram ki, müqəddəs üçrəngli bayrağımız bütün Qarabağ torpağında dalğalanacaq! Qarabağ bizimdir! Qarabağ Azərbaycandır!”
Zəfər ORUCOĞLU Azərbaycan Jurnalistlər Birliyinin üzvü
