Mərkəzi ABŞ-da yerləşən “Johnson & Johnson” şirkəti Azərbaycanın işğal olunmuş torpaqlarında yaradılan separatçı rejimi təbliğ edir. Son günlər şirkətin rəsmi "Twitter" hesabında qondarma quruma dəstək paylaşımları edilir.
Azərbaycanın ərazi bütövlüyünə hörmətsiz yanaşma ortaya qoyan “Johnson & Johnson”un bu addımı ciddi etiraz doğurub. Sosial şəbəkələrin Azərbaycan seqmentində həmin şirkətin məhsullarının boykot edilməsi barədə çağırışlar səsləndirilir.
Qeyd edək ki, 1886-cı ildə qurulan “Johnson & Johnson” korporasiyası müxtəlif növ gigiyena və sağlamlıq üçün dərman preparatlarının satışı ilə məşğuldur. Həmin məhsulların siyahısını təqdim edirik: dəri üçün - “Le Petit Marseillais”, “Clean Clear”, “Neutrogena Norveç Formulu”, “Johnson’s” məhsulları; uşaqlar üçün - “Desitin”, “Johnson's Baby” məhsulları; qadın gigiyenası üçün - “Carefree”, O.B. məhsulları; ağız boşluğu təmizliyi üçün - “Reach”, “Listerine”, “Metroqil Denta” məhsulları; mədə-bağırsaq preparatları – “İmodium”, “Mikroklizma Mikrolaks” məhsulları; soyuqdəyməyə və qrip əleyhinə - “Geksoral”, “Doktor MOM”, “Rinza”, “Tizin” məhsulları; digərləri – “Vizin”, “Nikorette” məhsulları.
Onu da əlavə edək ki, paytaxtda fəaliyyət göstərən bəzi supermarket və ticarət obyektləri “Johnson & Johnson”un istehsal etdiyi məhsulların satışını dayandırıblar.
"Bolmart" supermarketlər şəbəkəsi, "RAHAT" supermarketlər şəbəkəsi, "Grandmart" mağazalar şəbəkəsi, “Araz” supermarket şəbəkəsi və “Bazar Store” supermarket şəbəkəsi də mərkəzi ABŞ-da yerləşən “Johnson & Johnson” şirkətinin məhsullarının satılmasından imtina ediblər.
“Bəzi beynəlxalq şirkətlər bu illər ərzində daim düşmənə dəstək veriblər”
Azərbaycan Uşaqlar Birliyinin sədri Kəmalə Ağazadə bildiridi ki, informasiya savaşı zamanı xarici şirkətlərin iç üzünü gördük: “Bəzi beynəlxalq şirkətlər bu illər ərzində daim düşmənə dəstək veriblər. Bu da erməni lobbisinin fəaliyyətindən irəli gəlir. Artıq biz bu müharibə dövründə informasiya savaşı zamanı xarici şirkətlərin iç üzlərini görürük. İllərdir biz onların məhsullarından istifadə edirik. Amma kim onların fəaliyyətini araşdıra bilmişdi?! Bundan öncə də “McDonalds” şirkəti erməni terroruna qarşı paylaşım edib, daha sonra onu sildi ki, bizim məqsədimiz yalnız insanlara xidmət etməkdir. Nəticədə onların çoxsaylı işçisi birlik göstərərək işdən imtina etdi. Sadəcə olaraq, biz bu şirkətlərin iç üzünü vaxtında aşkarlasaydıq, içimizdəki düşmənləri də tez bir zamanda görə bilərdik”.
Günel CƏLİLOVA
