Dünyanın koronavirusla bağlı mənzərəsi getdikcə daha tünd çalarlar almaqdadır. Tibb elmi üçün yeni olan COVID-19 infeksiyasına yoluxanların sayı günbəgün deyil, saatbasaat artır. Tədqiqatçılar hazırda virusun yayılmasında kritik mərhələ olduğunu söyləyirlər. Dünya ölkələrinin əksəriyyəti koronavirus pandemiyasının yeni dalğasını yaşayır.
Məlumdur ki, dünyanın bir çox ölkəsində virusun yayılmasının qarşısını almaq üçün ciddi tədbirlər həyata keçirilir, tətbiq olunmuş karantin rejimi sərtləşdirilir. Son bir həftədə İsveçrədə koronavirusa yoluxma və ölüm halları ikiqat artıb. Ekspertlər infeksiyaya yoluxmanın bu sürətlə davam edəcəyi təqdirdə 10-14 gün sonra ölkədəki xəstəxanaların reanimasiya şöbələrində boş çarpayı qalmayacağı barədə xəbərdarlıq ediblər. Gündəlik yoluxma sayının 8600 nəfərə çatması isə İsveçrə hökumətini yeni məhdudiyyətlərin tətbiqinə vadar edib.
Fransada koronavirusa yoluxma hallarının artması ilə əlaqədar 30 oktyabrdan etibarən özünütəcrid rejimi yenidən tətbiq olunur.
Məlumdur ki, son zamanlar Azərbaycanda da koronavirusa yoluxanların sayında kəskin artım müşahidə edilir, yoluxma və sağalma halları arasında fərq yüksəlir, sanitar-epidemioloji durum pisləşir.
İnfeksiyaya yoluxma sayı oktyabrın 29-da 1015-ə çatdı. Bu səbəbdən yeni növ koronavirus infeksiyasının yayılmasının, onun törədə biləcəyi fəsadların qarşısının alınması məqsədilə Nazirlər Kabinetinin qərarına əsasən, ölkə ərazisində xüsusi karantin rejiminin müddəti 1 dekabradək uzadıldı.
Eyni zamanda, ölkə ərazisində mövcud sanitar-epidemioloji vəziyyətin təhlilinə əsasən, son günlər Lənkəran şəhərində, Cəlilabad və Masallı rayonlarında yüksək yoluxma faktları aşkar olunub. Buna görə Sabirabad şəhəri, Sabirabad rayonunun Cavad, Türkədi, Qalağayın və Kürkəndi kəndləri, Şəki şəhəri və Kiş kəndi, Lənkəran rayonunun Şağlaküçə və Şıxəkəran kəndləri, Quba şəhəri, Quba rayonunun Rustov və Zərdabi kəndləri, Mingəçevir şəhəri, Ağstafa, Biləsuvar, Xaçmaz, İsmayıllı, Qax, Zaqatala rayonları ilə yanaşı, 29 oktyabr saat 00:00-dan etibarən Lənkəran şəhərinə, Cəlilabad və Masallı rayonlarına operativ və xüsusi təyinatlı nəqliyyat vasitələrinin, eləcə də yükdaşıyan avtomobillərin hərəkəti istisna olmaqla, giriş-çıxış 1 dekabr saat 06.00-dək dayandırılıb.
Həmçinin Bakı, Sumqayıt, Gəncə, Yevlax, Mingəçevir, Şəki, Şirvan, Lənkəran şəhərlərində və Abşeron, Göygöl, Samux, Sabirabad, Quba, Ağstafa, Biləsuvar, Xaçmaz, İsmayıllı, Qax, Zaqatala, Cəlilabad, Masallı rayonlarında həftəsonları 31 oktyabr saat 00:00-dan 2 noyabr saat 06.00-dək; 7 noyabr saat 00:00-dan 9 noyabr saat 06:00-dək; 14 noyabr saat 00:00-dan 16 noyabr saat 06:00-dək; 21 noyabr saat 00:00-dan 23 noyabr saat 06:00-dək; 28 noyabr saat 00:00-dan 30 noyabr saat 06:00-dək ictimai nəqliyyatın hərəkəti dayandırılacaq.
Onu da qeyd edək ki, virusa yoluxma sayının 1000-i keçməsi ilə TƏBİB ölkədə həyəcan təbili çaldı. Virusa yoluxma sayının daha da artmaması üçün nə kimi tədbirlər görmək lazımdır?
“Azərbaycanda koronavirusun bu şəkildə yayılması itkilərə səbəb ola bilər”
Professor, tibbi ekspert Adil Qeybulla qeyd etdi ki, artım bütün dünya üzrədir. Bu, tendensiyadır. Avropa ölkələrində artıq pik həddə yoluxma var. Fransa, İtaliya və Amerikada yoluxma sayı kəskin artıb: “Təbii ki, Azərbaycanda da artım var, amma əhalinin sayını nəzərə alanda başqa ölkələrə nisbətən xeyli qənaətbəxş idi. Ancaq son hadisələr, yəni vətən torpaqlarının işğaldan azad edilməsi ilə bağlı olan haqq savaşı və Ermənistanın təcavüzü müəyyən qədər buna rəvac verdi, onun doğurduğu emosional vəziyyət koronavirusu arxa plana keçirdi”.
Həkimin sözlərinə görə, insanların rayonlara axışması, bir az da Abşeron yarımadasında miqrasiyanın artması və ictimai nəqliyyatdakı bərbad vəziyyət yoluxma sayının artmasına gətirib çıxarıb: “Həmişə olduğu kimi, ictimai nəqliyyatda normal vəziyyət yaratmaq mümkün olmadı. Metronun bağlanması da ictimai nəqliyyatın üzərində yükü artırdı və beləliklə, xeyli yoluxma potensialı yaratdı. Bundan başqa, insanların qapalı mühitdə karantin davranışlarına əməl etməməsi də öz rolunu oynadı”.
A.Qeybulla hesab edir ki, bu vəziyyətdə karantin qaydaları sərtləşdirilə bilər: “Bilirsiniz ki, artıq bəzi kənd və şəhərlərdə müəyyən karantin tədbirləri görülüb, oradakı epidemioloji vəziyyəti nəzərə alaraq, giriş-çıxış məhdudlaşdırılıb. Bildiyiniz kimi, ali məktəblərdə, orta məktəblərdə tətil elan olundu, metro bağlandı. Ola bilər müəyyən məhdudlaşdırıcı tədbirlər yenə də görülsün, hətta məsələ SMS icazəyə qədər gedib çıxa bilər. Hər halda, hesab edirəm ki, insanlar buna anlayışla yanaşmalıdırlar. Çünki yoluxmanın ön cəbhəyə transfer edilməsi, əsgərlərimiz arasında yayılması kifayət qədər ciddi məsələdir. Biz çalışmalıyıq ki, buna yol verilməsin. Bu, bizim ümumi, həyati vacib işimizə xeyli kölgə sala bilər.
Azərbaycanda koronavirusun bu şəkildə yayılması itkilərə səbəb ola bilər, amma biz vəziyyətdən maksimum az itkilərlə çıxmaq üçün əlimizdən gələni etməliyik”.
Günel CƏLİLOVA
