Son günlər Azərbaycanda koronavirusa yoluxma rekord həddə çatıb. Virusa yoluxma sayının artmasını ekspertlər müxtəlif səbəblə əlaqələndirirlər. Mütəxəssislərin fikrincə, virusun yayılma səbəblərindən biri də cavanların sosial məsafəyə və maska taxma qaydasına riayət etməməsidir.
Araşdırmalara görə, koronavirusa yoluxma bütün yaş qrupları arasında qeydə alınsa da, orta yaşlı insanlar arasında daha çoxdur.
TƏBİB-in Elmi Komitəsinin sədri, Elmi-Tədqiqat Profilaktika İnstitutunun direktor müavini, professor Akif Qurbanov media nümayəndələrinə açıqlamasında qeyd edib ki, yaşından asılı olmayaraq, ümumilikdə, çoxsaylı təmasa məruz qalan insanların koronavirusa yoluxma ehtimalı daha çoxdur: “Yaşlı xəstələr bu xəstəliyi ağır keçirirlər. Cavan xəstələrdə xəstəliyin klinik əlamətləri ya yüngül, ya da heç olmaya bilər. Amma cavanlarda da xəstəliyin bu cür müşahidə edilməsi pisdir, çünki onlar çox zaman xəstələndiklərinin fərqində olmurlar. “Bir balaca soyuqlamışam, özümü narahat hiss edirəm" desələr də, virusa yoluxduqlarını fikirləşmirlər. Bu halda, koronavirusa yoluxan cavanlar əsl infeksiya mənbəyi olurlar və digər insanları virusa yoluxdururlar. Bu məsələlərin hamısına diqqət etmək lazımdır".
Məsələ ilə bağlı fikir bildirən həkim-ekspert Rasif Bağırov qeyd etdi ki, cavanların əksəriyyəti maska taxmır və sadə qaydalara məhəl qoymurlar. Əmindirlər ki, xəstəliyi yüngül keçirəcəklər: “Ümumiyyətlə, insanlar karantin qaydalarına əməl etmirlər. Evdə oturan yoxdur. Çölə çıxanlar isə maskasız heç nə olmamış kimi sərbəst şəkildə hərəkət edirlər. Cavanlar maska taxmağı özlərinə sığışdırmırlar. Cavanlar nəzərə almalıdırlar ki, onlar virusa yoluxduğu müddət ərzində daşıyıcı olur və virusu sürətlə yayırlar. Onlar düşünmürlər ki, yaşlı insanlar bu xəstəliyi evdə yüngül müşahidə altında keçirə bilməyəcəklər. Bu səbəbdən də gənclər bu məsələyə ciddi yanaşmalıdırlar”.
Həmsöhbətimiz hesab edir ki, insanlar sosial izolyasiya qaydalarına əməl etməsələr, karantin qaydaları daha da sərtləşdirilə bilər.
Günel CƏLİLOVA
