“Koronavirusla bağlı vəziyyət hazırda kritikdir, ağırdır və daha da ağırlaşacaq”. Bunu TƏBİB-in infeksion xəstəliklər üzrə işçi qrupunun rəhbəri Vasif Əliyev media nümayəndələrinə açıqlamasında deyib.
O qeyd edib ki, oktyabrın 23-də 800-dən çox yoluxma var idi, bundan sonra yoluxmanın nə qədər olacağı bəlli deyil, amma görünən odur ki, artan istiqamətdə davam edir: “Təbii ki, bu, bizi narahat edir. Biz ona görə hər zaman insanlara xəbərdarlıq edirdik ki, mövcud vəziyyət daha da ağır ola bilər. Amma daha diqqətli olmaq yerinə, ciddi nizam-intizam yoxdur. İnsanların bu tələbləri yerinə yetirməsini, sadəcə, onların məsuliyyətinə buraxmaq olmaz, eyni zamanda, bunun üçün ciddi nizam-intizam, nəzarət olmalıdır. Düşünürəm ki, mövcud vəziyyət belə davam edərsə, karantin rejiminin şərtləri də təkrar gözdən keçirilməlidir”.
Koronavirusun yoluxma arenasının daha da genişlənəcəyini ekspertlər də təsdiq edir. Onların fikrincə, yaxın həftələr ərzində vəziyyət daha da pisləşəcək.
“...tam təcridə gedə bilərik...”
Tibb üzrə fəlsəfə doktoru Vasif İsmayıl bildirdi ki, yoluxma sayının kəskin şəkildə artmasının başlıca səbəbi vətəndaş məsuliyyətsizliyidir: “Hələ şiddətli soyuqları görməmişik. Bu, birbaşa vətəndaşların qoruyucu tədbirlərə əməl etməməsi ilə bağlıdır. Odur ki, karantin qaydalarına əməl etməli, profilaktik tədbirləri yerinə yetirməliyik. Əks halda tam təcridə gedə bilərik, karantin rejimi daha da sərtləşdirilə və iş yerləri yenidən bağlana bilər. Əhalinin yazla müqayisədə daha çox test etdirməsinin rolu olduğunu deyə bilmərəm, tendensiyalar onu göstərdi ki, virusun yayılmasının səbəbi əhalinin etinasızlığıdır. Vətənin keşiyində duran əsgərlərimiz, doğma yurdlarına dönəcək yaşlılarımız, əzizlərimiz üçün hər kəs qaydalara riayət edib, maska taxmalıdır”.
Günel CƏLİLOVA
