Sentyabrın 27-də düşmən təxribatı nəticəsində başlayan və Azərbaycan Ordusunun güclü əks-hücum əməliyyatları ilə müşayiət olunan döyüşlər davam edir. İndiyədək ordumuz ard-arda ciddi uğurlar qazanır, yeni-yeni yaşayış məntəqələrimiz işğaldan azad olunur.
Döyüşlər başlayandan ölkədə qismən səfərbərlik və hərbi vəziyyət elan edildi. Bu səbəbdən ehtiyatda olan əsgər və zabitlərimiz orduya çağırıldılar ki, onlar arasında şəhid olanlar da var. Döyüşə yollanan və şəhid olan vətəndaşlarımız içərisində kredit borcluların olması da istisna deyil. Hətta bu barədə ara-sıra məlumatlar yayılır.
Belə məlumatlardan biri də Beynəlxalq Bankdan döyüş əməliyyatlarında birbaşa iştirak edən mayor rütbəli zabitə zəng olunaraq kredit borcunu gecikdirdiyi ilə bağlı xəbərdarlıq olunmasıdır. Qeyd edək ki, son zamanlar bir sıra banklar döyüşdə iştirak edən hərbçilərin ailələrinə kredit borcunun ödənilməsi ilə bağlı xəbərdarlıq ediblər. Ancaq banklar unudurlar ki, onların ən böyük ödənişi işğal altında olan torpaqları azad etməkdir. Təəssüf ki, bəzi banklar hələ də öz mənfəətlərini düşünürlər.
Üzeyir Cəfərov: “Beynəlxalq Bankdan döyüş əməliyyatlarında birbaşa iştirak edən mayor rütbəli zabitimizə zəng edib utanmadan "siz kredit borcunuzu gecikdirirsiniz" deyən adama…”
Hərbi ekspert Üzeyir Cəfərov bildirdi ki, ölkədə 1 aya yaxındır yaramaz ermənilərlə, onların gizli və açıq havadarları ilə müharibə gedir. Bakıda oturan bəzi yaramazlar hələ də yuxudan ayılmayıblar: “Onları mal-mülk və var-dövlət maraqlandırır. Beynəlxalq Bankdan döyüş əməliyyatlarında birbaşa iştirak edən mayor rütbəli zabitimizə zəng edib utanmadan "siz kredit borcunuzu gecikdirirsiniz" deyən adama nə deyəsən? İnşallah, yaxın vaxtlarda döyüşlər bitsin, çox başlar ağrıyacaq. Çoxunuz cavab verməli olacaqsınız”.
Samir Əliyev: “Şəhid ailələrinin sosial müdafiəsinin gücləndirilməsi ilə bağlı qanun olsa…”
İqtisadçı-ekspert Samir Əliyev bildirdi ki, “Şəhid adının əbədiləşdirilməsi və şəhid ailələrinə edilən güzəştlər haqqında” Qanun var: “Bu qanun 1993-cü ildə Heydər Əliyev tərəfindən imzalanaraq, qüvvəyə minib. Həmin qanunun 3 və 4-cü maddələri məhz sözügedən məsələ ilə bağlıdır. Amma qanunda qeyd olunan güzəştlər yetərli deyil. Şəhid ailələrinin sosial müdafiəsinin gücləndirilməsi ilə bağlı qanun olsa, daha yaxşı olardı və burada da bütün məsələlər öz əksini tapmalıdır. Məsələn, şəhid ailəsi hansı güzəştlərə malik olmalıdır? Burada kommunal xidmətdə güzəştlərin tətbiq olunması, təhsil haqlarına güzəştlərin tətbiq edilməsi və sair kimi hallar mütləq orada öz əksini tapmalıdır. Bildiyim qədər, şəhid ailələrinə ayrı-ayrı epizodik güzəştlər var, amma bunu bir qanun halında qəbul edib, vahid bir yanaşma tətbiq edilsə, yaxşı olar. Biz bunu ayrı-ayrı fərdlərə tətbiq etməməliyik. Tutaq ki, filankəsin ipotekası var idi, şəhid oldu, bağlandı. Bunu ümumi qanun halında hamıya tətbiq etmək lazımdır. Avtomatik olaraq bu qanunun əsasında da bu tip problemlər aradan qalxar. Məsələn, bu adamın ipoteka krediti varsa, adam işləyib, bu ipotekanı qaytara bilərdi, indi bu şəxs işləmir və gedib Vətən uğrunda şəhid olub. Dövlət bu zaman onun öhdəliklərini öz üzərinə götürməlidir. Düşünürəm ki, şəhid olmuş vətəndaşların ailələrinin sosial öhdəliklərini dövlət öz üzərinə götürməlidir. Yəni burada ipotekadan azad edilməsi məsələsi, gələcəkdə dövlət tərəfindən pulsuz mənzillərlə təmin edilməsidir”.
Günel CƏLİLOVA
