Günün istənilən saatında şəhərin hətta mərkəzi küçələrində belə, ağırtonnajlı avtomobillərə rast gəlmək mümkündür. Məlumdur ki, Bakıda çəkisi 5 tondan çox olan yük avtomobillərinin gündüz vaxtı hərəkətinə məhdudiyyət qoyulub.
Bu, Nazirlər Kabinetinin Yol Hərəkəti Təhlükəsizliyi Komissiyasının Bakı şəhərində nəqliyyatın hərəkətinin təkmilləşdirilməsi üzrə qərarından sonra edilib. Qərarda deyilir ki, qəza-bərpa və xilasedici və kənd təsərrüfatı məhsullarını daşıyan hər növ nəqliyyat vasitələri istisna olmaqla, 5 tondan artıq olan yük avtomobillərinin gündüz vaxtı hərəkəti məhdudlaşdırılıb.
Vətəndaşların çoxsaylı müraciəti nəzərə alınaraq, "Bakı şəhərində nəqliyyatın hərəkətinin təkmilləşdirilməsi üzrə əlavə tədbirlər haqqında" Azərbaycan Respublikası Nazirlər Kabinetinin Yol Hərəkəti Təhlükəsizliyi Komissiyasının 30 iyun 2015-ci il tarixli Protokolunda 09.03.2016-cı il tarixdə müvafiq dəyişikliklər edilib. Dəyişikliklərə əsasən, paytaxtda nəqliyyat sıxlığının azaldılması məqsədilə xüsusi təyinatlı, o cümlədən, qəza-bərpa və xilasedici, həmçinin, kənd təsərrüfatı məhsullarını daşıyan bütün növ nəqliyyat vasitələrinin hərəkəti istisna olmaqla, icazə verilən maksimum kütləsi 5 tondan artıq olan yük avtomobillərinin hərəkəti Bakı şəhərində mayın 1-dən oktyabrın 1-dək səhər saat 07:30-dan axşam saat 21:00-dək, oktyabrın 1-dən mayın 1-dək səhər saat 07:30-dan axşam saat 20:00-dək məhdudlaşdırılıb.
Buna baxmayaraq, Bakı şəhərinin mərkəzi küçələrində, gündüz saatlarında ağır tonlu avtomobillərin hərəkətinə rast gəlirik. Belə avtomobillər minik avtomobillərinin sərbəst hərəkətinə maneə olurlar.
“…həm piyadalar, həm də sürücülər üçün olduqca böyük təhlükədir”
Məsələ ilə bağlı fikir bildirən nəqliyyat eksperti Eldəniz Cəfərov qeyd etdi ki, hər gün ağır tonlu avtomobillər yollarda sərbəst hərəkət edirlər. Bu problemi artırmadan aradan qaldırmaq lazımdır: “Bakı şəhərinə 5 tondan artıq çəkisi olan avtomobillərin girişi səhər saat 7:00-dan axşam saat 21:00-a qədər qadağandır. Bu qərar 2015-ci ildə qəbul olunub. Bu avtomobillərin Bakı şəhərində, intensiv yollarda hərəkəti həm piyadalar, həm də sürücülər üçün olduqca böyük təhlükədir. Həmin avtomobillərin yolu keçən piyadayla heç bir vizual kontaktı olmur. Yəni sürücü piyada ilə bir-birini, eyni zamanda, yolun sağında, yaxud solunda irəliləyən minik avtomobillərinin hərəkətini görə bilmir. Elə həmin minik avtomobilləri də yük avtomobili ilə uyğunlaşa, paralel hərəkət edə bilmir. Bu, böyük problemdir. Ağır tonlu maşınların törətdiyi yol qəzalarının şahidi olmuşuq. Bu məsələ kökündən həll olunmalıdır. Bu və ya digər avtomobilin şəhərə daxilolma icazəsi məsələləri də ləğv olunmalıdır”.
Günel CƏLİLOVA
