25/11/2020 05:41
728 x 90

Azərbaycanda məhkumlar da vətənpərvərlik hərəkatına qoşulub - lakin ekspertlər hələ buna ehtiyac olmadığını deyir...

Şəmsəddin Əliyev: “Məhkumların cəbhədə döyüşməsinə heç bir ehtiyac yoxdur”

img

Ordumuzun terrorçu Ermənistanın işğalçı silahlı birləşmələri tərəfindən işğal edilən Azərbaycan ərazilərinin düşmən tapdağından azad edilməsi istiqamətində həyata keçirdiyi hərbi əməliyyatlar cəmiyyətin bütün təbəqələri tərəfindən böyük ruh yüksəkliyi ilə qarşılanır. Respublikamızın bütün yerlərindən könüllü olaraq orduya qatılmaq, düşmənə qarşı cəbhədə mübarizə aparmaq üçün minlərlə gənc var və onlar müxtəlif çağırış məntəqələrinə müraciət edərək cəbhəyə getmək istədiklərini bildirirlər.

Sentyabrın 27-dən başlayaraq Qarabağ cəbhəsində düşmənə qan udduran ordumuzun qazandığı qələbələr hər bir vətəndaşımızda ordumuzla çiyin-çiyinə döyüşmək istəyi, arzusu yaradıb.

Azərbaycanın cəzaçəkmə müəssisələrində məhkumluq həyatı yaşayan vətəndaşlarımız arasında da kifayət qədər cəbhədə döyüşmək arzusunda olan var. Məkhumlar arasında saysız insan var ki, onlar Prezident İlham Əliyevə müraciət edərək onların Vətən müharibəsində iştirak etmələrinə göstəriş verməsini istəyirlər. Məhkumlar ölkə başçısına ünvanladıqları müraciətlərdə qeyd edirlər ki, Vətənin belə ağır günündə cəbhədə olmaq, işğalçı Ermənistana qarşı döyüşmək, torpaqlarımızın işğaldan azad edilməsində iştirak etmək arzusundadırlar.

Əlbəttə, bu insanların vətənpərvərliyinə heç kəs şübhə etmir və onların torpaqlarımızın düşmən tapdağından azad edilməsində iştirak etmək arzusunu normal qarşılayır.

Ekspertlər hesab edirlər ki, məhkumların bu məsələ ilə bağlı Prezidentə müraciət etməsi onların həqiqətən də vətənpərvərliyindən, düşmənin bizə qarşı etdiyi təxribatlarla, terror hadisələri ilə barışmamasından xəbər verir. Ekspertlərin fikrincə, elə cinayət növləri var ki, onlara görə məhkum edilənlər heç cür azadlığa buraxılıb cəbhəyə göndərilə bilməz. Xüsusən də Vətənə xəyanət etmiş, terror aktı törətmiş, başqa bu kimi əməllərə görə məhkum edilənlərin cəbhəyə buraxılmasının yolverilməz olduğunu deyən ekpertlər bildirirlər ki, biz hazırda bunun nümunəsini Ermənistanda görürük. Ermənistanda həm Birinci Qarabağ Müharibəsi dövründə, həm də hazırda xüsusi ağır cinayətlər törətmiş, terrorçulardan, qanqsterlərdən ibarət xüsusi batalyonlar qurulub. Bunun düşmən dövlətin faşist mahiyyətinin göstəricisi olduğunu deyən ekspertlərin qənaətinə görə, Azərbaycan tərəfindən heç zaman belə addım atıla bilməz. Ekspertlər deyirlər ki, ehtiyac olarsa, yalnız yüngül cəza törətmiş insanların müraciətləri nəzərdən keçirilə bilər, hazırda isə buna heç bir ehtiyac yoxdur, Azərbaycan Ordusu kifayət qədər güclüdür.

  • “...hər bir vətəndaşımız düşmən tapdağında olan torpaqlarımızın işğaldan azad olunmasında könüllü şəkildə iştirak etmək istəyir”  

“Polisə Dəstək” İctimai Birliyinin rəhbəri, tanınmış hüquqşünas Şəmsəddin Əliyev “Bakı-Xəbər”ə bildirdi ki, ordumuzun buna ehtiyacı yoxdur. “Düşünürəm ki, məhkumların cəbhədə döyüşməsinə  heç bir ehtiyac yoxdur. Əvəlla bilirsiniz ki, Ali Baş Komandan tərəfindən ölkəmizdə qismən səfərbərlik elan olunub. Bu da o deməkdir ki, çağırış yaşı çatmış, eyni zamanda da döyüş təcrübəsi olan, müxtəlif hərbi sənətlərə yiyələnmiş adamlar cəbhəyə çağırılırlar. Ehtiyac olarsa, digər könüllülər də orduya cəlb edilə bilərlər. Amma cəzaçəkmə müəssisəsində məhkumluq həyatı yaşayanların cəzadan azad edilib cəbhəyə göndərilməsinə lüzum yoxdur. Amma dövlət tərəfindən humanist addım atılaraq bu qərar verilərsə, burada yalnız cəzasının bitməsinə az müddət qalmış, ağır və xüsusi ağır cinayətlərə görə məhkum olunmuş şəxslər yox, kifayət qədər yüngül cinayət törətmiş şəxsləri həbsdən azad edib cəbhə bölgəsinə göndərmək olar. Amma bu gün buna zərurət yoxdur. Bu gün cəbhəyə gedib döyüşmək istəyən məhkumların vətənpərvərlik hisslərini alqışlayıram, sağ olsunlar. Onların bu təşəbbüsləri Vətənə olan sədaqətlərinin, vətənpərvərliklərinin nümunəsidir. Bir hüquqşünas kimi məsələyə yanaşmam bu cürdür. Bu onu göstərir ki, harada olmasından asılı olmayaraq, hər bir vətəndaşımız düşmən tapdağında olan torpaqlarımızın işğaldan azad olunmasında könüllü şəkildə iştirak etmək istəyir”.

İradə SARIYEVA

Son xəbərlər