26/10/2020 03:06
728 x 90

Koronavirusa yoluxma sürəti yaydakı səviyyəni üstələyə bilər - Azərbaycanda mövcud durum…

Vasif Əliyev: “İnsanların diqqətinin daha çox ön cəbhəyə yönəlməsi koronavirus kimi “düşməni” unutmağa səbəb oldu”

img

Son günlər koronavirusa yoluxma sayında ciddi artım müşahidə olunur. Yoluxma sayı oktyabrın 15-də son günlərin ən pik həddinə çataraq 530 olub.

Qeyd edək ki, son 10 gün ərzində koronavirusa yoluxanların sayı sürətlə dəyişərək artdı. Ekspertlər hesab edirlər ki, qısa müddətdə yoluxma sayının artması yaydakını ötə bilər.

  • “Koronavirusla bağlı təhlükə sovuşmayıb, bu cür sürətlə davam edərsə, COVID-19-a yoluxma yay fəslində olan rəqəmləri də keçə bilər”

İnfeksionist Vasif Əliyev bildirdi ki, son günlər Azərbaycanda koronavirusa yoluxma faktında artım müşahidə olunur. Oktyabrın 15-də yoluxma sayı 500-ü keçib. Bu, vətəndaşların xəstəliyə ciddi nəzarət etməməsindən xəbər verir: “İnsanların diqqətinin daha çox ön cəbhəyə yönəlməsi koronavirus kimi “düşməni” unutmağa səbəb oldu. Bu infeksiyanın aktuallığının itirilməsi səbəbilə artıq yoluxma hallarında ciddi artım var. Çünki aparılan tədbirlər nəticəsində yoluxma ilə bağlı azalma oldu, insanlar arxayınlaşdı və nəticədə bu cür rəqəm qeydə alınıb. Ölkədə müharibə şəraiti ilə əlaqədar əhalinin hərbi hissələrin önünə toplaşması, könüllülərin orduya yola salınması zamanı qaydalara əməl edilməməsi yoluxma sayına da təsir edib. Biz özümüzün, yaxınlarımızın, ordumuzun da sağlamlığını istəyiriksə, zəruri tədbirlərə əməl etməliyik. Burada əsas fərdi məsuliyyət olmalıdır. Maska taxılmalı, sosial məsafə qorunmalı və gigiyena qaydaları qorunmalıdır”.

İnfeksionist xüsusi olaraq vurğuladı ki, koronavirusla bağlı təhlükə sovuşmayıb. Bu cür sürətlə davam edərsə, COVID-19-a yoluxma yay fəslində olan rəqəmləri də keçə bilər. Artıq Gürcüstanda koronovirusa yoluxma 700-ə, düşmən ölkə Ermənistanda isə 1000-ə yaxındır: “Artım olarsa, qarşısını almaqda çətinlik çəkəcəyik. O zaman karantin rejimi yenidən gözdən keçirilə bilər”.

Günel CƏLİLOVA

Son xəbərlər