Hesab edirik ki, məktəblərin bağlı olduğu 2 həftə ərzində yoluxma sayı azala bilər. Trend-in məlumatına görə, bunu Təhsil naziri Emin Əmrullayev bu gün keçirdiyi brifinqdə deyib.
Onun sözlərinə görə, son günlərdə qeydə alınan yoluxma sayı sürətlə artır: "Təhsil sistemi 2 milyona yaxın təhsilalanı özündə təmsil edir. Bu təhsilalanların məktəbə getməsi yoluxma hallarının sayının artmasına təkan verə bilər".
E.Əmrullayev əlavə edib ki, son günlər ərzində koronavirusa görə bağlanan məktəblərin sayı çoxalıb.
Məktəblərdə karantin deyil, tətil elan edilib
Nazir bildirib ki, məktəblərdə karantin deyil, tətil elan edilib. Bu, o deməkdir ki, məktəb şagirdləri üçün bu və digər qaydada dərs keçirilmir. Onun sözlərinə görə, noyabrda bir həftə tətil var idi: "Biz bu tətili digər tətil günləri ilə əvəzləşdirə biləcəyik".
Nazir bildirib ki, məktəblərin özlərində kütləvi yoluxma halına rast gəlinməyib. Onun sözlərinə görə, bu gün elan edilən tətildə tədris müddəti qısaldılmır: "Bu tətil tədris ilinin azalmasına və şagirdlərin daha az müddətdə təhsil almasına səbəb olmayacaq. Şagirdlər bu gün olmayan təhsili qarşıdakı vaxtda alacaqlar".
Repetitorluq fəaliyyəti davam edə bilər
"Təhsilalanlar üçün repetitorluq fəaliyyəti davam edə bilər" - deyən Təhsil nazirinin sözlərinə görə, əgər repetitorluq fəaliyyəti normalara uyğun davam edərsə, problem olmaz.
Bu günə qədər 546 şagird, 186 müəllim koronavirusa yoluxub
E.Əmrullayev bildirib ki, oktyabrın 15-ə olan məlumata görə, məktəblərdə koronavirusa yoluxan şagirdlərin sayı 546 nəfər, 186 müəllim olub.
Tədris kurslarının fəaliyyətinə toxunan nazirin sözlərinə görə, hər kəsin qaydalara əməl etməsi lazımdır: "Hazırda bir çox tətbiqlər işləyir, onların üzərindən də onlayn təhsil vermək mümkündür".
Orduya gedən tələbələr...
Naziri E.Əmrullayev bildirib ki, orduya gedən tələbələr, qayıtdıqdan sonra təhsillərini davam etdirəcəklər. Onun sözlərinə görə, könüllü hərbi xidmətə yollanan tələbələr qayıtdıqdan sonra, təhsillərini davam etdirə biləcəklər. Bunula bağlı heç bir məhdudiyyət yoxdur. Əsas arzumuz həmin tələblərin sağ-salamat geri qayıtmasıdır.
