Son günlər Azərbaycanda COVID-19 infeksiyasına yoluxanların sayında ciddi artım müşahidə edilir. Rəsmi məlumata görə, oktyabrın 13-də 359 nəfər koronavirusa yoluxub. Koronavirusa yoluxanlar sırasında 14 şagird və 4 müəllim də var.
Demək olar ki, hər gün davamlı olaraq koronavirusa yoluxmadan qorunmanın üsulları barədə yerli KİV-də yetərincə maarifləndirici yazılar, ekspertlərin fikir və rəyləri əks olunsa da, yenə də Azərbaycan vətəndaşları arasında mövcud qaydalara əməl etməyənlərə rast gəlinir. Bu amil də ölkəmizdə virusa yoluxanların artım dinamikasını daha da sürətləndirir. Virusa yoluxmanın artmasının əsas səbəbkarı kimi ictimai nəqliyyat vasitələri, ictimai yerlərdə əhalinin sosial məsafə gözləməməsi və maskadan istifadə etməməsi halları göstərilir. Mütəxəssislərin fikrincə, profilaktik tədbirlərə əməl edilməsə, qısa zamanda yoluxanların sayında daha ciddi artım ola bilər. Qeyd edək ki, koronavirus hazırda bir sıra rayonlarda da ciddi şəkil alıb.
Məlum olduğu kimi, Baş nazir Əli Əsədov “Xüsusi karantin rejimi ilə bağlı əlavə tədbirlər barədə” Azərbaycan Respublikası Nazirlər Kabinetinin 2020-ci il 12 sentyabr tarixli, 336 nömrəli Qərarında dəyişiklik edilməsi haqqında qərar imzalayıb. Qərara əsasən, xüsusi karantin rejimi dövründə operativ və xüsusi təyinatlı nəqliyyat vasitələrinin, habelə yükdaşıyan avtomobillərin hərəkəti istisna olmaqla, Sabirabad şəhərinə, Sabirabad rayonunun Cavad, Türkədi, Qalağayın və Kürkəndi kəndlərinə, Şəki şəhərinə və Kiş kəndinə giriş-çıxış dayandırılır. Qərar 2020-ci il 14 oktyabr saat 00:00-dan qüvvəyə minib.
“Virusun aktivləşməsinin əsas səbəbi ictimai nəqliyyatdır”
“İnkişafa Doğru Qadın Təşəbbüsü” İctimai Birliyinin sədri Ziba Nəbiyeva bizimlə söhbətində bildirdi ki, Azərbaycan dövləti infeksiyanın yayıldığı ilkin mərhələdə vəziyyəti ciddi nəzarət altında saxlayaraq əhalinin sağlamlıq, təhlükəsizlik və sosial rifahının təmin edilməsi sahəsində bütün lazımi tədbirləri çevik şəkildə həyata keçirib.
Yoluxmanın sürətlə artması səbəblərinə və bunun qarşısının alınması yollarına gəlincə, Z.Nəbiyeva bildirdi ki, bunun üçün mövcud qaydalara əməl edilməlidir. O, təəssüflə qeyd etdi ki, virusun artmasına səbəb vətəndaş məsuliyyətsizliyidir. “Virusun aktivləşməsinin əsas səbəbi ictimai nəqliyyat vasitələridir. Böyük marketlərdə proses tam olaraq ciddi nəzarətdə saxlanır, orada yoluxma risqi, demək olar ki, yox dərəcəsindədir.
Problem ictimai nəqliyyatdır, avtobus və metrodur. İctimai nəqliyyatın sürücüsü öz işi ilə məşğuldur, nəqliyyatı idarə edir, onun salona nəzarət etməsi çətindir. Fikrimcə, ictimai nəqliyyatda, avtobusda əlavə bir işçi olmalıdır ki, o, gün ərzində avtobusa, metroya daxil olan sərnişinlərin qaydalara necə riayət etdiyini idarə etsin, onların maska taxmasını, sosial məsafə gözləməsini nəzarətdə saxlasın. Yəni hər bir avtobusda ayrıca bir şəxs olmalıdır, bu, könüllülərdən də ola bilər, bu proses nəzarətdə saxlanmalıdır. Digər tərəfdən, xəttə buraxılan ictimai nəqliyyat vasitələrinin sayı artırılmaldır. Nəqliyyata daxil olan sərnişinlərin sayı idarə olunmalıdır. Heç vaxt avtobuslarda, metroda sərnişin sıxlığı üçün şərait yaradılmamalıdır. Bilirsiniz ki, həm metroda, həm də avtobuslarda sərnişinlər bir-birinə yapışırlar. Metroya daxilolma elə idarə olunmalıdır ki, ora insanlar müəyyən sayla daxil olsunlar. Bunu etmək tam mümkündür. Müharibə şəraitindəyik, cəbhədə qızğın döyüşlər gedir. Bu vəziyyətdə nə üçün əhalimiz, avtobus şirkətləri özlərində sosial məsuliyyət hiss etmirlər. Bu gün həkimlərimizin bir qismi ön cəbhədə xidmət edən əsgərlərimizə qulluq edir. Bununla da arxa cəbhədəki həkimlərimizin sayı, istər-istəməz, azalmış olur. İndi bizdən daha çox vətəndaş məsuliyyəti, sahibkarlardan isə ciddi nəzarət, keyfiyyətli xidmət tələb olunur. Bütün nəqliyyat şəbəkəsində mövcud qaydalar ciddi şəkildə qorunmalıdır, bunu nəzarətdən kənarda qoymaq olmaz. Vətəndaşa həmişə “maska tax”, “sosial məsafə saxla” deyilməlidir”.
Z.Nəbiyeva qeyd etdi ki, Bakı sakinlərinin müəyyən bir qismi maskadan istifadə etmir, bölgələrdə insanların heç biri maska taxmır. Bunun dəfələrlə şahidi olduğunu deyən Z.Nəbiyevanın sözlərinə görə, nəqliyyatda maska taxmayanların çoxu rayonlardan gələnlərdir. “Hətta bir neçə dəfə bunun şahidi olmuşam. Bir dəfə gördüm ki, üç nəfər ictimai nəqliyyata daxil oldu, üçü də maska taxmamışdı. Sürücüyə yaxınlaşıb dedim ki, niyə onların maskasız salona daxil olmasına etiraz etmirsiniz? Deyir ki, mən nə deyim, onlar cərimələnirlər də, yenə də başa düşmürlər. Mən sürücünü də qınaya bilmirəm, çünki o, avtobusu idarə edir və onun fikri yayınmamalıdır. Həmin o üç nəfərə yaxınlaşıb “nə üçün maska taxmırsınız”soruşdum. Dedilər ki, biz rayondan gəlmişik. Sonra maskanı ciblərindən çıxarıb taxdılar. Dedim ki, siz rayondan gəlmisiniz, buradan virusu aparıb rayonda başqalarını yoluxdura bilərsiniz. Rayonlarda heç kəs maska taxmır. Rayonlarda, bölgələrdə prosesin idarə olunması müvafiq idarələrə, icra hakimiyyəti orqanlarına tapşırılmalıdır. Bakı ilə müqayisədə rayonlarda karantin qaydalarına riayət edilmir, əhali maskalardan istifadə etmir” - deyə Z.Nəbiyeva vurğuladı.
İradə SARIYEVA
