Üçrəngli bayrağımız dövlətimizin rəmzidir. Bu gün hər birimiz Vətənimizin özgürlük simvolu olan bayrağımızı ucalardan ucalarda dalğalanmasını, işğaldan azad edilən və ediləcək doğma torpaqlarımızın başı üzərinə sancılmasını istəyirik.
Ali Baş Komandanımızın əmrilə Ermənistanın təxribatçı əməllərinin qarşısının alınması istiqamətində şanlı ordumuzun əks-əməliyyat tədbirlərinə başlaması Azərbaycan cəmiyyətində böyük ruh yüksəkliyi, qələbə əzmi, inam yaradıb. Hər birimiz Ermənistan tərəfindən işğal edilən torpaqlarımızın hamısının düşmən əsarətindən tam olaraq azad ediləcəyinə böyük əminlik ifadə edirik və ordumuza inanırıq, onunla qürur duyuruq. Bu gün uşaqdan tutmuş böyüyə qədər hər kəs ordumuza dəstək verir. Sentyabrın 27-dən bəri ölkəmizin hər şəhərində, qəsəbəsində, kəndində, hər evdə, hər idarədə, hər binada Azərbaycanın üçrəngli bayraqları asılıb, maşınların, ictimai nəqliyyatın, hətta yük maşınlarının üzərini, aynasını, üstünü bayrağımız bəzəyir. Bayrağımız bu gün həyatımızın ayrılmaz bir parçasına çevrilib və hər zaman başımız üzərindədir.
Son günlər ictimaiyyətin bayrağa tələbatının artması müşahidə edilir. Hər bir vətəndaşımız bayraq alıb evindən asır. Bu arada bəzi işbazlar bayraq satışında süni qiymət artımına yol verir və bayrağın qiymətini qaldırırlar. Bu məsələ həm cəmiyyətdə, həm sosial şəbəkələrdə, həm də KİV-də çox ciddi narazılıqla qarşılanır. Bu gün ölçüsündən asılı olaraq, bayrağımıza yeni qiymətlər qoyulur. Son hadisələrə qədər 6 manata satılan bayraq 8, 10-12 manata olan bayraqlar isə 14-15 manata satılır. Bayrağa qiymət qoyulması həqiqətən də mənfi bir haldır.
“...bəzi işbazlar vətəndaşlarımızın bayrağa tələbatından sui-istifadə edərək onun qiymətini süni şəkildə artırırlar”
Filologiya üzrə fəlsəfə doktoru, tanınmış şairə-jurnalist Qiymət Məhərrəmli hesab edir ki, bayrağa qiymət qoymaq olmaz. “Əslində, bayrağın satışı simvolik qiymətə olmalıdır ki, istənilən vətəndaş üçün əlçatan olsun. Çox təəssüflər olsun ki, bəzi işbazlar vətəndaşlarımızın bayrağa tələbatından sui-istifadə edərək onun qiymətini süni şəkildə artırırlar. Neçə gündür sosial şəbəkələrdə bu məsələ ciddi şəkildə müzakirə edilir. Bu müzakirələri düşmən də görüb izləyir, sabah bunu bizim əleyhimizə istifadə edə bilər. Halbuki, düşmənlə müharibə apardığımız bir dövrdə bayrağın baha qiymətə satılması baş verməməli idi. İşbazların bu əməlləri yolverilməzdir. Bunun qarşısı hansısa yollarla təcili alınmalıdır. Onlar bayrağın qiymətini 2 manat artırmaqla nə əldə edirlər? Əslində, heç nə qazanmırlar. Bayrağa qiymət qoyulması, ümumiyyətlə, düzgün deyil. Bayrağa qiymət qoyub satan işbazlar bir az da milli dövlətçilik maraqlarımızı düşünməlidirlər. Bayraq satışı ilə məşğul olan mağazalar bayrağımızı vətəndaşlarımıza ya pulsuz paylamalı, ya da simvolik qiymətə satmalıdırlar. Bu gün cəbhədə oğullarımız zəfər dastanı yazır, biz o oğullarla güclüyük, Vətən onların şücaətilə, qəhrəmanlığı, fədakarlığı ilə güclüdür”.
Q.Məhərrəmlinin sözlərinə görə, son günlər bəzi vətənpərvər vətəndaşlarımız, xüsusən də gənclər bayraq aksiyası keçirir və insanlarımıza bayraq hədiyyə edirlər ki, hər evdən, hər eyvandan bayrağımız dalğalansın, bununla da dövlətimizin haqq işinə, müzəffər ordumuza dəstək olaq.
Bu gün xaricdə yaşayan azərbaycanlıların da hər birinin evinin Azərbaycan bayrağı ilə süsləndiyini deyən Q.Məhərrəmli hesab edir ki, bu, xalqımızın birliyinin, həmrəyliyinin göstəricisidir.
İradə SARIYEVA
