Cəbhəyanı bölgələrdə polis əməkdaşları xidmət başındadırlar. Bu barədə Daxili İşlər Nazirliyinin (DİN) yaydığı məlumatda qeyd olunub. Bildirilib ki, artıq bir neçə gündür axşam saatlarında ölkənin bəzi şəhər və rayonlarında komendant saatı tətbiq edilir.
Bununla əlaqədar polis və Daxili Qoşunların hərbi qulluqçuları tərəfindən Bakı şəhəri ilə yanaşı, bölgələrdə də postlar qurulub. Cəbhəyanı bölgələrdə polis əməkdaşları günün 24 saatını ictimai asayişi təmin etmək üçün xidmətlərini yorulmadan davam etdirirlər.
“Təxribat xarakterli halların qarşısının alınması üçün cəbhə bölgələrində də komendant saatının tətbiqi qaçılmazdır”
Polis əməkdaşlarının cəbhəyanı bölgələrdə fasiləsiz xidmət göstərməsi barədə fikir bildirən “Polisə Dəstək” İctimai Birliyinin rəhbəri, hüquqşünas Şəmsəddin Əliyevin sözlərinə görə, təmas xəttində komendant saatı tətbiq edilməli idi: “Təxribat xarakterli halların qarşısının alınması üçün cəbhə bölgələrində də komendant saatının tətbiqi qaçılmazdır. Məlumat üçün bildirim ki, 1991-1992-ci illərdə təcavüzçü ermənilərlə döyüşənlər arasında polislər də olub. Azərbaycan polisinin bu sahədə təcrübəsi danılmazdır”.
Həmsöhbətimiz onu da əlavə etdi ki, cəbhə bölgəsində də polislər 24 saat fasiləsiz xidmətdə olacaqlar. Onlar fasiləsiz ictimai asayişi təmin etməklə məşğul olacaqlar. Polislər yorulmadan, qürur hissilə cəbhəyanı bölgələrdə xidməti vəzifələrini icra edəcəklər.
Günel CƏLİLOVA
