Sentyabrın 27-də Ermənistan bir neçə istiqamətdən Azərbaycanın yaşayış məntəqələrini, hərbi mövqelərini atəşə tutub. Düşmənin ağır artilleriyadan istifadə etməsi nəticəsində Tərtər, Naftalan, Goranboy, Ağdam və digər rayonlarda xeyli sayda evlərə, əmlaklara, şəxsi təsərrüfatlara və avtomobillərə ziyan dəyib.
Baş Prokurorluğun mətbuat xidmətinin yaydığı məlumatda qeyd olunur ki, Ermənistan hərbi birləşmələri əhalinin kompakt olduğu məntəqələri – rayon və kənd mərkəzlərini, mülki infrastruktur obyektlərini – yaşayış evlərini, xəstəxanaları, tibb məntəqələrini, məktəb binalarını, uşaq bağçalarını, dövlət qurumlarının inzibati binalarını, təsərrüfat təyinatlı əraziləri ağır artilleriya qurğularından intensiv atəşə tutmaqda davam edir. İşğalçı ölkənin silahlı qüvvələrinin mülki infrastruktur obyektləri atəşə tutması nəticəsində 175 yaşayış evinə, həmçinin, 41 mülki obyektə külli miqdarda ziyan vurulub, eləcə də dinc sakinlərə məxsus nəqliyyat vasitələri yararsız vəziyyətə düşüb, çoxsaylı xırda və iribuynuzlu heyvan tələf olub.
Təcavüzkar ermənilərin mülki əhalinin yaşayış evlərinə, onların daşınmaz əmlakına, təsərrüfatlarına vurduqları ziyanı sığorta şirkətləri qarşılayacaqmı?
Azər Əliyev: “Sığorta şirkətləri hazırda korporativ sosial məsuliyyət çərçivəsində cəbhəyə lazımi ləvazimatların, ərzaq və digər məhsulların göndərilməsində iştirak edir”
Azərbaycan Sığortaçılar Assosiasiyasının (ASA) sədri Azər Əliyev bildirib ki, beynəlxalq təcrübəyə əsasən müharibə və bu tipli risqlərin yaratdığı zərərlər sığorta şirkətləri tərəfindən təmin edilmir: “Azərbaycanda sığorta qanunvericiliyi də beynəlxalq təcrübəyə əsaslandığı üçün müharibə şəraitində əmlaklara dəyən ziyan sığorta şirkətləri tərəfindən qarşılanmır. Digər tərəfdən həmin ərazilərdəki evlərin və digər əmlakların sığortalanıb-sığortalanmaması məsələsi qeyri-müəyyəndir. Bu məsələ dəqiqləşəndən sonra ASA-da sığorta şirkətləri ilə müzakirə edilə bilər. Ümumilikdə isə belə hallarda adətən dəyən ziyan dövlət tərəfindən təmin edilir".
A.Əliyev onu da əlavə etdi ki, sığorta şirkətləri hazırda korporativ sosial məsuliyyət çərçivəsində cəbhəyə lazımi ləvazimatların, ərzaq və digər məhsulların göndərilməsində iştirak edir. O cümlədən Silahlı Qüvvələrə Yardım Fonduna iri məbləğlərdə vəsait ianə edilir.
Kamran Ələkbərov: “Döyüş zamanı vətəndaşın evinə, maşınına və şəxsi təsərrüfatına dəymiş ziyanı sığorta şirkətləri qarşılamalıdır”
Sığorta eksperti Kamran Ələkbərov isə bildirdi ki, istisna hallarda sığorta şirkətləri zərər görmüş daşınmaz obyekt və şəxsi təsərrüfata dəymiş ziyanı qarşılaya bilər. Bura müharibə də aiddir: “Döyüş zamanı vətəndaşın evinə, maşınına, şəxsi təsərrüfatına zərər dəyə bilər. Necə ki, bu günlərdə təcavüzkar ermənilər təmas xəttində yaşayan mülki əhalini hədəfə alaraq sadə vətəndaşlara ziyan vururlar. Belə olduğu halda, sığorta şirkətləri həmin insanların ziyanını qarşılayır. Hazırda tək sığorta şirkətləri deyil, hər kəsi işğal altında olan torpaqların azad olunmasını arzu edir. Bunun üçün hamı əlini daşın altına qoymalıdır. Kimin üzərinə nə iş düşürsə onu da etməlidir. Sığorta şirkətləri də döyüş zamanı mülki əhaliyə dəymiş ziyanı qarşılamalıdır”.
Günel CƏLİLOVA
