Sentyabrın 27-dən Ermənistan-Azərbaycan təmas xəttində başlayan hərbi əməliyyatlar hamıda mübarizə ruhunu oyadıb. Kimi ön cəbhədə, kimi isə arxa cəbhədə Azərbaycanın torpaqlarının bütövlüyü uğrunda mübarizə aparır. Bu gün şəhərin küçələrində, evlərin eyvanlarında, avtomobillərdə müqəddəs Azərbaycan və Türkiyə bayraqları dalğalanır.
Hətta küçədə azyaşlıların əllərində də bayraqlar dalğalanır. Müşahidələr göstərir ki, bayrağa tələbat artıb. Ən pisi isə bayrağa tələbatın çox olduğu bir vaxtda bəzi işbazların qiymət artımına getməsidir.
Paytaxtın mərkəzindəki satış nöqtələrində bayrağın qiymətləri ilə maraqlandıq. Məlum oldu ki, həqiqətən də müxtəlif ölçülərdə təklif olunan bayraqların qiyməti artıb. Bayraqların qiyməti 2-3 dəfə bahalaşıb.
Onu da qeyd edək ki, bəzi mağazalarda bayraq satışı dayandırılıb. Mağazalar bunun səbəbini anbarlara yeni malların gətirilməməsi ilə izah ediblər. Satıcıların sözlərinə görə, hər gün vətəndaşlar bayraq üçün müraciət edirlər.
“28 May” metrostansiyası yaxınlığında yerləşən kitab mağazalarından birindən bayraq istədik. Satıcı bizi görən kimi gileylənməyə başladı: “Bizdə bayraq yoxdur. Yerində bahadır deyə, mən gətirmirəm. Başqa mağazalara baxın, hamısı bayraqları “od qiyməti”nə satır. Belə şey olar? İnsafınız olsun... Müharibə vəziyyətində bayrağın da qiymətini bahalaşdırarlar?”
Ərazidəki digər mağazalarda qiymətlərin yarıbayarı bahalaşdığının şahidi olduq. Ən kiçik ölçüdə bayrağın qiyməti 50 qəpikdir. Masaüstü kiçikölçülü bayrağın qiyməti 1 manat idisə, indi 3 manata təklif olunur. Eni 50, uzunluğu 100 sm olan bayrağın qiyməti əvvəl 2-3 manat arasında dəyişirdisə, hazırda qiymətlər 6-7 manatdır. Ölçülərə görə bayraqların qiyməti 7, 10, 18, 36 və 45 manat arasında dəyişir.
Tanınmış prodüser Tarix Əliyev (Tolik) bayraqların satış qiymətinin bahalaşması haqqında sosial şəbəkə hesabında məlumat paylaşıb. Qeyd edir ki, belə vaxtda bəzi işbazlar bayraqların qiymətini artırıb: “Bu arada bəzi fürsətçilər bayrağın qiymətini dəfələrlə qaldırıb. Mən bu iki bayrağa 130 manat pul vermişəm”.
Ramil Məmmədli: “İndiki müharibə şəraitində bayraqların qiymətlərinin bahalaşması yolverilməzdir”
Hərbi ekspert Ramil Məmmədlinin sözlərinə görə, indiki müharibə şəraitində bayraqların qiymətlərinin bahalaşması yolverilməzdir. Əksinə, bayraq istehsalı ilə məşğul olan müəssisələr, şəxslər vətənpərvərlik ruhunu yüksək tutmaq üçün bayraqların qiymətini ucuzlaşdırmalıdırlar ki, hər kəs alıb, evindən, eyvanından, avtomobilindən asa bilsin.
Günel CƏLİLOVA
